Թուրքիան կարող է չհամաձայնվել բարելավել հարաբերությունները Հայաստանի հետ. փորձագետ

regnum.ru-ն գրում է, որ որոշումը, թե ի՞նչ պայմաններում են կարգավորվելու հայ-թուրքական հարաբերությունները և արդյո՞ք դրանք ընդհանրապես կկարգավորվեն կկայացնի Թուրքիան։

Այդ մասին  REGNUM-ի թղթակցին ասել է ՄԳԻՄՕ-ի ռազմաքաղաքական հետազոտությունների կենտրոնի առաջատար փորձագետ Միխայիլ Ալեքսանդրովը:

«Հայաստանը երկար տարիներ ցանկանում է կարգավորել հարաբերությունները Թուրքիայի հետ։ Նույնիսկ Սերժ Սարգսյանի օրոք եղել են հայ և թուրք պաշտոնյաների հանդիպումներ, որտեղ քննարկվել են հարաբերությունների կարգավորման հարցեր։ Բայց հետո ամեն ինչ վատ է ընթացել հենց այն պատճառով, որ Թուրքիան նախնական պայմաններ է դրել։ Իսկ Հայաստանը ցանկանում է բարելավել հարաբերություններն առանց որևէ նախապայմանի։ Բայց Թուրքիան կարող է չհամաձայնվել սրան։ Այսինքն խնդիրը հենց թուրքական դիրքորոշման մեջ է»,- ասել է փորձագետը։

Քաղաքագետը հիշեցրել է, որ Թուրքիայի նախապայմաններն են եղել Հայաստանի կողմից ցեղասպանության թեման քարոզելուց հրաժարվելը և Լեռնային Ղարաբաղից հրաժարվելը։ Փորձագետի կարծիքով Թուրքիայի և Հայաստանի միջև Ղարաբաղի շուրջ հակասությունների սրությունը զգալիորեն նվազել է 2020 թվականի պատերազմի արդյունքում հայերի կողմից տարածքների զգալի մասի կորուստից հետո։ Ուստի, ղարաբաղյան հիմնախնդիրն այլևս չի կարող լինել այնպիսի նյարդայնացնող գործոն թուրք-հայկական հարաբերություններում, որքան եղել է գրեթե 30 տարի։ Անդրադառնալով ցեղասպանության թեմային՝ փորձագետն ընդգծել է, որ Հայաստանը չի կարող հրաժարվել դրանից:

«Իհարկե, Հայաստանն արդեն պատրաստ է Թուրքիայից չպահանջել ցեղասպանության ճանաչումը։ Բայց Հայաստանը չի հրաժարվի այդ հարցը համաշխարհային հարթակներում առաջ քաշելուց և ձգտելու է հասնել ցեղասպանության ճանաչմանը այլ երկրների խորհրդարանների կողմից»,- ասել է քաղաքագետը։ Միխայիլ Ալեքսանդրովն ընդգծել է, որ հարաբերությունները կարգավորելու որոշումը հենց Թուրքիան է ընդունելու, բոլոր առավելությունները նրա կողմն են, և ներկայումս շատ դժվար է ասել՝ նա նման որոշում կկայացնի՞, թե՞ ոչ։

Նյութը հրապարակման պատրաստեց Կամո Խաչիկյանը