«Հայոց արծիվները» պատրաստ են կռվել ՆԱՏՕ-ի դեմ. պարտավոր են օգնել միակ դաշնակցին

eadaily.com-ը գրում է, որ վերջին 30 տարիների ընթացքում աշխարհի տարբեր ծայրերում ազգասպան գործողություններ են իրականացվել, և դա հիմնականում տեղի է ունեցել ՆԱՏՕ-ի ղեկավարի՝ ի դեմս ԱՄՆ-ի, անմիջական հրահրման արդյունքում: Այդ մասին ասված է «Հայոց Արծիվներ-Միացյալ Հայաստան» կուսակցության առաջնորդ, «Հայոց արծիվներ» կամավորական ջոկատի հրամանատար, զինված ուժերի գնդապետ Խաչիկ Ասրյանի հայտարարության մեջ։

«Հյուսիսատլանտյան ռազմաքաղաքական դաշինքը՝ ՆԱՏՕ-ն, որը ստրկացնում և ոչնչացնում է անկախ ժողովուրդներին, ինքնիշխան պետություններին, խորհրդային պետություններից մեկի՝ Ուկրաինայի միջոցով, փորձում է ռազմական գործողություններ սկսել Հայաստանի միակ ռազմավարական դաշնակից Ռուսաստանի դեմ իբր պաշտպանելու համար Ուկրաինան, որը ոչնչացվում է նույն հավաքական Արևմուտքի կողմից։ Երեք տասնամյակ ես նշել եմ, որ Հայաստանի և Հայկական լեռնաշխարհում ապրող հայերի համար արտաքին ռազմաքաղաքական և տնտեսական սերտ համագործակցության միակ և ճշմարիտ ճանապարհը Ռուսաստանի հետ ազնիվ և իսկական բարեկամությունն է։ Ուստի «Հայոց Արծիվներ-Միացյալ Հայաստան» կուսակցությունը լիովին մերժում է ՆԱՏՕ-ի գործունեությունը մեր տարածաշրջանում, հատկապես Հայաստանի Հանրապետությունում, և կոչ է անում ՀՀ կառավարությանը անհապաղ հեռացնել ՆԱՏՕ-ին Հայաստանից, հակառակ դեպքում մենք ինքներս կհեռացնենք այն»,- ասել է Ասրյանը առանց հստակեցնելու, թե Անդրկովկասյան հանրապետությունում ՆԱՏՕ-ի ի՞նչ ներկայության մասին է խոսքը։ 

«Հայոց արծիվները» միաժամանակ կոչ են արել Հայաստանի իշխանություններին բաց պաշտպանությամբ հանդես գալ իրենց միակ ռազմավարական դաշնակցի նկատմամբ։

«Ռուսաստանի դեմ ՆԱՏՕ-ի ռազմական գործողությունների դեպքում Հայաստանի կառավարությունը պարտավոր է ռազմաքաղաքական աջակցություն ցուցաբերել Ռուսաստանի Դաշնությանը, որը Հայաստանի Հանրապետության և Արցախի Հանրապետության արտաքին անվտանգության միակ երաշխավորն է»,- ասված է կոչում։

«Հայոց արծիվների» առաջնորդի հրամանատարությամբ գործող կամավորական ջոկատը հայտարարել է, որ եթե ՆԱՏՕ-ն ռազմական գործողություններ սկսի բարեկամ Ռուսաստանի դեմ, ապա նրանք պատերազմին կմասնակցեն ՌԴ ԶՈւ կազմում։

«Հայոց արծիվների» առաջնորդը նախկինում ևս հայտարարություններ է արել իր ղեկավարած կամավորական ջոկատի՝ ռուսական բանակի շարքերը համալրելու և ՆԱՏՕ-ի ուժերի դեմ ռազմական գործողություններին մասնակցելու պատրաստակամության մասին։

Նյութը հրապարակման պատրաստեց Կամո Խաչիկյանը