Տրյուդոն հայտարարել է Պուտինի, Լավրովի դեմ խիստ պատժամիջոցների մասին
ԱշխարհԿանադայի վարչապետ Ջասթին Տրյուդոն հայտարարել է, որ Կանադան պատժամիջոցներ կսահմանի Ռուսաստանի Դաշնության նախագահ Վլադիմիր Պուտինի, ՌԴ արտաքին գործերի նախարարի և Պուտինի աշխատակազմի ղեկավարի դեմ՝ Ուկրաինա Ռուսաստանի ներխուժմանը նրանց մասնակցության համար, գրում է The Hill-ը:
«Կանադան խիստ պատժամիջոցներ կկիրառի նախագահ Պուտինի, նրա աշխատակազմի ղեկավարի և արտաքին գործերի նախարարի դեմ՝ այն մարդկանց, որոնք կրում են ամենամեծ պատասխանատվությունը Ուկրաինայում տեղի ունեցած մահերի և ավերածությունների համար», - ասել է Տրյուդոն:
Բացի այդ վարչապետը հավելել է, որ Կանադան «նաև պատժամիջոցներ կկիրառի Բելառուսի և նրա ղեկավարների դեմ՝ նախագահ Պուտինի ներխուժմանը նպաստելու համար։ Այս պատժամիջոցները ուղղված են լինելու 57 անձի, և դրանք ի լրումն են Ալեքսանդր Լուկաշենկոյի ռեժիմի դեմ արդեն իսկ սահմանված տասնյակ պատժամիջոցների»։
Նախօրեին հաղորդվել էր, որ Եվրամիության գագաթաժողովը համաձայնեցրել է Ռուսաստանի դեմ պատժամիջոցների պատմության մեջ ամենախիստ փաթեթը: Այս մասին հայտարարել է Ավստրիայի կանցլեր Կառլ Նեհամերը, հավելելով, որ ՌԴ-ի դեմ պատժամիջոցները ցավոտ կլինեն Եվրամիության համար:
Պատժամիջոցները կանդրադառնան նաև ՌԴ նախագահ Վլադիմիր Պուտինին և ԱԳ նախարար Սերգեյ Լավրովին: Միևնույն ժամանակ, Ռուսաստանի նախագահի և արտգործնախարարի մուտքը Եվրամիություն չի փակվի:
Հիշեցնենք, որ փետրվարի 24-ի առավոտյան ՌԴ նախագահ Վլադիմիր Պուտինը հայտարարել էր Ուկրաինայի ապառազմականացման համար հատուկ ռազմական գործողություն սկսելու մասին։
Հեռուստաուղերձում նա ասել էր, որ հանգամանքները «մեզնից պահանջում են վճռական և անհապաղ գործողություններ, Դոնբասի ժողովրդական հանրապետությունները օգնության խնդրանքով դիմել են Ռուսաստանին»։
Ռուսաստանի ղեկավարի խոսքով, արյունահեղության ողջ պատասխանատվությունը կլինի Ուկրաինայում իշխող ռեժիմի խղճի վրա։ Նա ուկրաինացի զինվորականներին կոչ է արել չկատարել ուկրաինական իշխանությունների հանցավոր հրամանները, վայր դնել զենքերն ու գնալ տուն։
1
2
3
4
5
1
2
3
4
5
2
3
4
5
