Հնարավո՞ր է Ծառուկյան - Օհանյան տանդեմ

«Փաստ» օրաթերթի հյուրն է քաղտեխնոլոգ Վիգեն Հակոբյանը

– Գագիկ Ծառուկյանը հայտարարել է քաղաքականություն վերադառնալու մասին: Նրա վերադարձը ի՞նչ կարող է փոխել քաղաքական դաշտում:

– Կարող է բերել բավականին էական փոփոխություններ, քանի որ Գագիկ Ծառուկյանն այն երկու քաղաքական գործիչներից մեկն է, ով այսօրվա դրությամբ որոշակի լուրջ վարկանիշ ունի: Մյուսը վարչապետ Կարեն Կարապետյանն է:
Այսօրվա քաղաքական դաշտի, մանավանդ ոչ իշխանական հատվածի գլխավոր պրոբլեմը լիդերների բացակայությունն է: Դրանով է պայմանավորված, որ այս անգամ բոլորի մոտ ավելի շատ դաշինքային տրամադրություններ են: Ընդգծված լիդերի բացակայությունը հանգեցնում է նրան, որ բոլորն զգում են` ինքնաբավ չեն և չկա առանցք, որի շուրջ կարող են միավորվել: Ուստի շատերը փորձում են կոնսոլիդացնել իրենց սուղ ռեսուրսները` թե՛ ֆինանսական, թե՛ կառուցվածքային, թե՛ ընդհանուր առմամբ ինստիտուցիոնալ, որպեսզի կարողանան արդյունքների հասնել: Ընդ որում, խոսքը հարաբերական արդյունքների մասին է, երբ պետք է ընդամենը փորձեն հաղթահարել նախանշված շեմը:
Ծառուկյանի վերադարձով, բնականաբար, շատերի ծրագրերը խառնվում են, որովհետև բավականին լուրջ քանակով ձայներ, որոնք պետք է բաշխվեին քաղաքական այլ դաշինքների և ուժերի միջև, ակնհայտորեն կարող են գնալ այն միավորմանը, որը գլխավորելու է նա:

– Դուք մոտավորապես պատկերացնո՞ւմ եք, թե լայն դաշինք ասելով Ծառուկյանն ում նկատի ուներ, չէ՞ որ հատկապես ընդդիմադիր դաշտի պատկերը` ով ում հետ է լինելու, արդեն քիչ, թե շատ ուրվագծված է:

– Միանշանակ ասելը դժվար է, քանի որ այդ լայն դաշինքը կարող է կազմված լինել ոչ միայն քաղաքական ուժերից, այլև հանրային ճանաչում ունեցող անհատներից և հասարակական սեկտորի ներկայացուցիչներից: Բայց եթե քաղաքական բլոկի մասին ենք խոսում, ապա հասկանալի է, որ բացի ԲՀԿ–ից կարող է լինել «Ալյանսը», չեմ բացառում, որ փորձ կարվի ՀԱԿ–ին էլ մտցնել: Համենայնդեպս, չեմ կարծում, թե ՀԱԿ–ը դեմ կլինի: Ընդհանրապես ցանկացողներ շատ կլինեն: Օրինակ՝ երեկ կարդացի, որ «Ժառանգությունն» էլ դեմ չէ:

– Բայց «Ժառանգությունը» բանակցում է Օհանյան–Օսկանյան դաշինքի հետ:

– Լրատվամիջոցներից մեկին տված հարցազրույցում այդ մասին ասել էր Արմեն Մարտիրոսյանը:

– Իսկ հնարավոր համարո՞ւմ եք Օհանյան–Ծառուկյան տանդեմը:

– Տեսականորեն, իհարկե, հնարավոր է: Բայց քանի որ, ըստ իս, Ծառուկյանի վերադարձը ոչ առանց Սերժ Սարգսյանի հետ խաղի կանոնների հստակեցումից հետո է եղել, հակված եմ մտածելու, որ, այնուամենայնիվ, իշխանությանը նման խոշոր կոնսոլիդացիա ձեռք չի տա: Եթե եղել են խաղի կանոնների ճշտումներ, կարծում եմ` այդ պայմանն էլ է դրվել:

– Հակառակ դեպքում չափազանց մեծ հակակշիռ կստեղծվի ՀՀԿ–ի դեմ:

– Այո: Պարզ է, որ այդ երկու դաշինքների միավորումը ռեսուրսների առումով էլ ավելի հզոր է դառնում: Ճիշտ է, կառուցվածքային առումով մեծ հնարավորություններ Ծառուկյանին դա չի տա, բայց քանի որ քաղաքական ցանկացած պրոցեսում կարևոր է քաղաքական ճանաչելի դեմքերի առկայությունը, երբ ընտրազանգվածները ճանաչում են բրենդը, ապա այդ առումով, անշուշտ, կողմերը կարող են միմյանց ուժեղացնել:

– Ձեր խոսքի սկզբում ասացիք, որ այսօր կան վարկանիշ ունեցող քաղաքական երկու լիդերներ` Կ. Կարապետյանը և Գ. Ծառուկյանը: Նրանց պայքարի արդյունքում ի՞նչ զարգացումներ կարող են լինել:

– Ցանկացած ընտրական գործընթաց, երբ կան ընդգծված լիդերներ, բերում է մրցակցության: Իսկ մրցակցությունը ոչ միշտ է վերահսկելի, եթե նույնիսկ նախապես հաստատվում են խաղի որոշակի կանոններ:

– Եվ որից գուցե շահի հասարակությունը կամ պետությունը:

– Առնվազն կարող է հետաքրքիր լինել:

Շարունակությունը` «Փաստ» օրաթերթի այսօրվա համարում: