Միկա Ղափլանյանը, Ելենա Բորիսենկոն, «Մեր թաղի տղերքի» երիտասարդ դերասանները և այլք՝ Ելենա Արշակյանի թիմի նոր հեռուստասերիալում

Ելենա Արշակյան-Անահիտ Մխիթարյան ստեղծագործական զույգը շուտով լսարանին կներկայացնի նոր հեռուստասերիալ՝ «Լքված ամրոցի պահապանները», որը մարտի 14-ից կլինի ATV-ի եթերում։

Սա կլինի նրանց երրորդ նախագիծը, որն այս շրջանում եթերում է, քանի որ «Մեր թաղի տղերքը» ու «Ամեն տարի գարնանը» հեռուստասերիալները ևս նրանց թիմն է ներկայացնում։

Սցենարիստ Անահիտ Մխիթարյանը Tert.am Life-ի հետ զրույցում պատմել է նախագծի մանրամասները։

Պատմությունը գիշերօթիկում սովորող երեխաների մասին է։ Անահիտը շեշտեց, որ իրենք կարևորում են սոցիալական թեմայի անդրադառնալը։

«Գիշերօթիկն  ինքն իրենով այնպիսի վայր է, որտեղ հայտնված երեխաները ամեն մեկն ունի իր պատմությունն ու տարբերվող ճակատագիրը: Ամեն մեկի մասին կարելի է առանձի ֆիլմ նկարել, մենք այդ ամենը մեկտեղել ենք ու դարձել է պատմությունների շարք: Որքան էլ երեխաների ճակատագրերը ծանր են ու լավ կյանքից չեն հայտնվել գիշերօթիկում, միևնույն է, այնտեղ որտեղ այդքան երեխա կա, չեն կարող չլինել նաև ուրախ պատմություններ, ու դա ինչ-խոսք թույլ է տալիս ողբերգության կողքին ցույց տալ մանկության հրաշքը: Այստեղ նաև պետք է նուրբ մոտենալ հարցին, դա իհարկե բարդացնում է աշխատանքը, բայց մենք պահել ենք բոլոր սահմանները»,- ասաց Անահիտը։

Հեռուստադիտողներն այս նախագծում կտեսնեն «Մեր թաղի տղերքը» նախագծում հերոսների մանկության տարիները մարմնավորած դերասաններին՝ Լիլիա Վարդանյանին, Վահագն Թուլբենջյանին, Բաբկեն Վարդանյանին, Ռաֆ Հարությունյանին․ «Երեխաներն իրենց արդարացրել էին ու շատ սիրվել։ Որոշեցինք ինքնադրսևորվելու ավելի մեծ հնարավորություն տալ»։

Նրանց կողքին լսարանը կտեսնի Վարուժան Մարգարյանին, Միկա Ղափլանյանին, Ելենա Բորիսենկոյին, Մերի Մովսեսյանին, Ծովինար Մարտիրոսյանին, Դիանա Խերանյանին և այլոց։

Ինչ վերաբերվում է միաժամանակ 3 նախագիծ անելուն՝ Անահիտը նշեց, որ ֆիզիկապես դա անհնար կլիներ, դրա համար ինքն ու Ելենան այլ տարբերակ են գտել։

«Վերջին մի քանի տարվա ընթացքում, գրեթե, առանց դադարի միաժամանակ անում էինք 2 նախագիծ։ Այդ տեմպին արդեն սովորել էինք: Երբ առաջարկ ստացանք անելու երրորդ նախագիծը, կամ պիտի հրաժարվեինք, կամ կայացնեինք նոր որոշում։ Որոշեցինք մեր թիմի երիտասարդ անդամներին ինքնադրսևորվելու հնարավորություն տալ։ Գտանք թեման, մտածեցինք հիմնական ուղղությունը, կյանք տվեցինք կերպարներին ու հանձնեցինք Քնարիկին ու Քրիստինեին, որպեսզի նախագծի հետ անցնեն մնացած ոչ հեշտ ճանապարհը: Քնարիկ Բաղդասարյանն աշխատել է սցենարական իմ թիմում և դիալոգներ գրել, իսկ ռեժիսոր Քրիստինե Հակոբջանյանը` Ելենայի թիմում որպես ռեժիսորի օգնական։ Այս տարիների ընթացքում, աշխատելով մեզ հետ, նրանք սովորել են աշխատանքի նրբությունները ու ժամանակն էր նրանց ինքնուրույն աշխատելու հնարավորություն տալ, իսկ մենք, իրենց իսկ ցանկությամբ, ուղղորդում ենք, օգնում ենք ու իրենց կողքին ենք: Այն պահին, երբ արդեն մեր կարիքը չեն ունենա, կսկսեն լրիվ առանձին աշխատել: Ես էլ, Ելենան էլ ուրախ ենք ու հուզված, որ ժամանակին մեր թիմ եկած ու անփորձ երկու աղջիկները, այսօր ինքնուրույն նախագիծ են իրականացնելու»- ասաց Անահիտը։