Արևմուտքը նախկին ԽՍՀՄ երկրներին ռուսաֆոբիա է սովորեցնում վերահսկվող հասարակական կազմակերպությունների միջոցով. քաղաքագետ Զախարով

riafan.ru–ն գրում է, որ Արևմուտքն աշխարհում արհեստականորեն ուղղորդված ռուսաֆոբիայի օջախներ է ստեղծում. այս մասին riafan.ru–ին հայտնել է «Երիտասարդական նախաձեռնությունների եվրասիական ինստիտուտի» ղեկավար, քաղաքագետ Դմիտրի Զախարովը։

Ըստ փորձագետի՝ ԱՄՆ-ն ու նրա դաշնակիցները վերահսկվող ՀԿ-ների միջոցով ռուսաֆոբիա են սովորեցնում և Ուկրաինայի, Ղազախստանի, Հայաստանի, Ղրղզստանի և նախկին ԽՍՀՄ այլ երկրների ժողովուրդներին։ «Ինչպես ասել է Լև Նիկոլաևիչ Գումիլյովը. «Չկան վատ ժողովուրդներ, կան վատ մարդիկ»: Եվ հենց այդ «վատ մարդիկ» են դաստիարակվել այն ծայրահեղ մոլեգին ազգայնականների կողմից, որոնց հովանավորում էր Արևմուտքը Խորհրդային Միության տարիներին։ Իսկ ԽՍՀՄ փլուզումից հետո նրանք սկսել են իրենց ձեռքերով ստեղծել «ազգային պետություններ», որոնք, ըստ էության, բազմազգ են, ինչպես Ռուսաստանը»,- ասել է նա։ Զախարովն ընդգծել է, որ Արևմուտքը «ձգում է արջի պոչը», խաղում է ազգամիջյան կռվների և ռուսաց լեզվի ճնշումների վրա։ «Դա շատ հարմար խնդիր է»,- հավելել է նա։

Քաղաքագետը նաև նշել է, որ ԱՄՆ-ում և Եվրոպայում հանդուրժողականությունը, որով այդքան հպարտանում են, բացարձակ չէ: «Դա ենթադրյալ «ժողովրդավարության» արտաքին իդեալն է, որից նա [Եվրոպա] մեծամասամբ արդեն իսկ խուսափում և օգտագործում է որպես քաղաքական գործիք աշխարհում միգրացիան կառավարելու համար»,- ասել է փորձագետը։

Նրա խոսքով՝ ո՛չ ռուսներին, ո՛չ, օրինակ՝ արաբներին, վաղուց չեն սիրում Եվրոպայում։ «Ընդհանրապես շատ ազգերի չեն սիրում։ Հենց այն պատճառով, որ նրանք մեծամասամբ կազմված մոնոէթնիկ պետություններ են, որտեղ այլ երկրների ժողովուրդները միշտ ոտնահարել են նրանց իրավունքները, իսկ գերիշխող, պետություն ձևավորողի դերը բացարձակ է եղել»,- ասել է նա riafan.ru-ին տված հարցազրույցում։

Եզրափակելով Դմիտրի Զախարովն ընդգծել է, որ հենց դա է այժմ «սովորեցնում» ԵՄ-ն նախկին ԽՍՀՄ երկրներին։ Պետությունների ներքին գործերին նման միջամտության համար, նրա խոսքերով, «ժամանակն է խփել նրանց ձեռքերին»։

Նյութը հրապարակման պատրաստեց Կամո Խաչիկյանը