Մանրամասներ՝ Երևան-Մեղրի ավտոճանապարհին վթարից տուժած քաղաքացիների առողջական վիճակի մասին

Երեկ` հունվարի 18-ին, Երևան-Մեղրի ավտոճանապարհին տեղի ունեցած ավտովթարի հետևանքով տուժած տղամարդուն և 3-ամյա երեխային վիրահատել են, նրանց վիճակը գնահատվում է ծանր կայուն: Այս մասին Shabat.am-ին հայտնեց Արարատի բժշկական կենտրոնի տնօրեն Արայիկ Սարդարյանը: «Մեզ մոտ գտնվող երկու հիվանդների վիճակը կարելի է բավարար գնահատել: Նրանցից մեկի մոտ կողերի կոտրվածք է առկա, մյուս մոտ՝ գանգուղեղային ցնցում: Այժմ նրանք պետք է շարունակեն կոնսերվատիվ բուժումը ստանալ և ժամանակի ընթացքում կվերականգնվեն: Ինչպես ավելի վաղ Shabat.am-ի հետ զրույցում հայտնել էր Արայիկ Սարդարյանը, վթարից տուժած վեց քաղաքցիներից չորսը տեղափոխվել էին մայրաքաղաք՝ երկու 3-ամյա երեխաներ և երկու մեծահասակներ, իսկ երկուսը շարունակում են գտնվել Արարարտի բժշկական կենտրոնում:

Հիշեցնենք,  որ Արտակարգ իրավիճակների նախարարություն հունվարի 18-ին՝ ժամը 02.11-ին, ահազանգ է ստացվել, որ Երևան-Մեղրի ավտոճանապարհի 53-րդ կմ-ին՝ Զոդի կամրջի մոտ, տեղի է ունեցել ՃՏՊ, կան տուժածներ. անհրաժեշտ է փրկարարների օգնությունը: Ըստ ԱԻՆ կայքի՝ դեպքի վայր է մեկնել մեկ մարտական հաշվարկ: Պարզվել է, որ բախվել են «ՎԱԶ-2106» մակնիշի 34 QR 153 (վարորդ՝ 1990 թ. ծնված Վ. Մ.) և «Mercedes» մակնիշի 34 AA 321 (վարորդ՝ 1983 թ. ծնված Ռ. Գ.) պետհամարանիշներով ավտոմեքենաները, ինչի հետևանքով Վ. Մ.-ը, Ռ. Գ.-ը, ուղևորներ՝ 2013 թ. ծնված Ռ. Ն.-ը, 1965 թ. ծնված Գ. Մ.-ը, 1999 թ. ծնված Ա. Լ.-ը և 2013 թ. ծնված Է. Գ.-ը տարբեր աստիճանի մարմնական վնասվածքներով փրկարարների և շտապօգնության աշխատակիցների ուժերով հոսպիտալացվել են Արարատի ԲԿ: Բժիշկները վարորդների և Ռ. Ն.-ի առողջական վիճակը գնահատել են ծանր, Ա. Լ.-ինը՝ միջին ծանրության, իսկ Գ. Մ.-ինը և Է. Գ.-ինը՝ բավարար: Փրկարարները հոսանքազրկել են ավտոմեքենաները, փակել գազի բալոնների փականները և ավտոմեքենաները տեղափոխել ավտոքարշակների վրա: