Yandex-ը փնտրում է տարածք Երևանում Ռուսաստանից ժամանած աշխատակիցների համար

newizv.ru–ն գրում է, որ Երևանում «Յանդեքս» ընկերությունը սկսել է տարածքներ փնտրել իր աշխատակիցների համար, ովքեր լքել են Ռուսաստանը Ուկրաինայում Ռուսաստանի ռազմական հատուկ գործողության մեկնարկից հետո։ Ռուսաստանից ՏՏ ոլորտի մասնագետների արտահոսքը Դոնբասի ճգնաժամի ֆոնին այնքան զգալի է ստացվել, որ միայն Yandex-ից Հայաստան է տեղափոխվել մոտ 100 մարդ։

«Այժմ նրանք փնտրում են աշխատանքային տարածք Երևանում մոտ 80 հոգու համար, որպեսզի կարողանան միասին աշխատել»,- նշում է Forbes-ը։

Ընկերությունն ինքը նշում է, որ Yandex-ը չի պլանավորում տեղափոխել իր գլխամասային գրասենյակը, ընկերությունը չի զբաղվում անձնակազմի տեղափոխմամբ։

Մինչդեռ Հայաստան տեղափոխված տասնյակ աշխատակիցներ կարիք ունեն մեկ աշխատանքային տարածքի, որտեղ նրանք բոլորը կարող են լինել միասին հեռավար աշխատելու ժամանակ։

Տեղափոխվածներին օգնելու խնդիրն այն է, որ դեռ պարզ չէ, թե ինչպե՞ս են նրանք աշխատավարձ ստանալու այն պայմաններում, երբ Visa-ն և Mastercard-ը դադարեցրել են համագործակցությունը ռուսական բանկերի հետ։

Այժմ սոցիալական ցանցերը քննարկում են Yandex-ի ծրագրերը իրենց Zen և News ծառայությունների հնարավոր վաճառքի վերաբերյալ։ Ենթադրվում է, որ Yandex-ը ցանկանում է լինել տեխնոլոգիական ընկերություն, սակայն Yandex.Zen-ը զարգանում է որպես սոցիալական ցանց, իսկ Yandex.News-ը չափազանց շատ քննադատության է արժանանում։ Սակայն ընկերությունից այդ հարցի վերաբերյալ պաշտոնական մեկնաբանություններ դեռ չկան։

Մարտի 4-ին Yandex-ը հայտարարել է, որ եթե իր որոշ պարտատոմսերի սեփականատերերը օգտվեն պահանջի իրավունքից, ընկերությունը չի կարողանա կատարել իր պարտքային պարտավորությունները։ Yandex-ի ղեկավարությունը նշել է, որ ընկերությունը ներկայումս «չունի բավարար ռեսուրսներ արժեթղթերն ամբողջությամբ հետ գնելու համար»։ Մինչդեռ Բրիտանիան պատժամիջոցներ է կիրառել Yandex-ի նոր ղեկավար Տիգրան Խուդավերդյանի նկատմամբ։

Նյութը հրապարակման պատրաստեց Կամո Խաչիկյանը