«Մենք ուշադիր հետևում ենք». ԵԽԽՎ-ն անտեսում է հումանիտար ճգնաժամը Ղարաբաղում

eadaily.com–ը  գրում է, որ «Եվրոպայի խորհրդի տարածքում կան բազմաթիվ պատճառներ, որոնք մեզ անհանգստացնում են, դա ոչ միայն ռուսական ագրեսիան է։ Այդ պատճառներից մեկն էլ Ադրբեջանի և Հայաստանի ու Լեռնային Ղարաբաղի միջև իրավիճակն է»,- մարտի 14-ին ասել է ԵԽԽՎ ղեկավար Թինի Քոքսը` պատասխանելով EADaily-ի թղթակցի այն հարցին, թե ինչո՞ւ է կազմակերպությունն անտեսում Լեռնային Ղարաբաղում հումանիտար ճգնաժամը և պատժամիջոցներ չի կիրառում:

«Ես համաձայն չեմ, որ մենք անտեսում ենք, մենք անում ենք այն, ինչ կարող է անել այս կազմակերպությունը։ Հակամարտությունը, որպես այդպիսին, ոչ թե Եվրոպայի խորհրդի, այլ ԵԱՀԿ-ի և հակամարտությունում ներգրավված կողմերի պայմանավորվածությունների մեջ է»,- ասել է Վեհաժողովի ղեկավարը։ Նա հավելել է, որ «ուշադիր հետևում են, թե ինչ է կատարվում», իսկ ինչ վերաբերում է Ռուսաստանին, այնտեղ շատ պարզ իրավիճակ է, և՛ Վեհաժողովի, և՛ Նախարարների կոմիտեի կարծիքով Ռուսաստանը հատել է «կարմիր գիծը», ինչն էլ հանգեցրել է կազմակերպության նման արձագանքին։

«Ավելին չեմ կարող ավելացնել, մենք շատ մտահոգված ենք այնտեղ (Լեռնային Ղարաբաղում) տիրող իրավիճակով, բայց հիմա մենք նախ պետք է զբաղվենք ռուսական խնդրով»,- եզրափակել է նա՝ նախանշելով հակամարտությունների մոտեցումների իրենց  առաջնահերթությունները։

Նյութը հրապարակման պատրաստեց Կամո Խաչիկյանը