Պայթեցրել են հայ քրեական հեղինակության մտերմուհու ավտոմեքենան․ տեսանյութ

Ռյազանի փողոցներից մեկում պայթել է Suzuki Grand Vitara ավտոմեքենա: Նախապես պատահարի պատճառը մեքենայի անսարքությունն էր համարվում: Սակայն պարզվել է, որ արտասահմանյան մակնիշի մեքենայի վրա պայթուցիկ սարք էր ամրացված, հայտնում է «Պրեստուպնայա Ռոսիա» պորտալը:

Վնասող տարրերով եւ 300 գրամ տրոտիլին համարժեք հզորությամբ պայթուցիկը ամրացված էր ուղիղ վարորդը նստատեղի տակ մեքենայի հատակին:

Մեքենայի ղեկին է եղել տեղի բնակիչ Սվետլանա Գրաչեւան, ում հաջողվել է ինքնուրույն դուռը բացել եւ սրահից տառացիորեն դուրս ընկնել: Նրան հոսպիտալացրել են: Բժիշկները հայտնել են, որ նրա կյանքին վտանգ չի սպառնում: Սակայն նախկինում հաղորդվել է, որ պայթյունի հետեւանքով Գրաչեւայի ոտքերը սաստիկ վնասվել են:

Ռուսաստանի Քննչական կոմիտեի Ռյազանի մարզի քննչական վարչությունում քրեական գործ է հարուցվել մահափորձի հոդվածով, որն իրականացվել է հասարակության համար վտանգավոր եղանակով (ՌԴ ՔՕ 30 հոդվածի 3-րդ մաս եւ 105 հոդվածի 2-րդ մասի «ե» կետ): Քննիչները երկու վարկած են առաջ քաշել՝ առաջինը կապված է տուժողի անձնական կյանքի հետ: Life-ի տեղեկություններով՝ Սվետլանա Գրաչեւան ամուսնալուծության եւ ունեցվածքի բաժանման գործընթացի մեջ է: Երկրորդ վարկածով կապ կա մահափորձի եւ կնոջ ծառայողական գործունեության միջեւ: Հայտնի է, որ Գրաչեւան քաղաքային երեք սեփականատերերի ընկերակցության՝ «Մայակովսկի», «Մայակովսկի-2» եւ «Ավանգարդ», նախագահն է:

Դրանից բացի, նա ծանոթ է քրեական աշխարհի ներկայացուցիչներին: Սվետլանա Գրաչեւան կապ է պահպանել «հեղինակավոր մարդու»՝ Նիկոլայ Պրոնինի հետ, որը 2016-ի դեկտեմբերին իր բնակարանում մահացած է հայտնաբերվել: Պրոնինն, իր հերթին, ընկերական հարաբերությունների մեջ էր «Թալալայ» մականվակիր Վլադիմիր Թալալեւի, «Հայրապետ» մականվակիր Վիկտոր Հայրապետովի հետ, որոնք իրենց հետքն են թողել 90-ական թվականներին: