Ռուսաստանի նոր ու սարսափազդու զենքը

Ուկրաինայում հացահատիկի մի քանի պահեստարաններ վնասվել են ռուսական ներխուժման սկզբից ի վեր, տեղեկացնում է Reuters-ը:

ԱՄՆ-ը տեղեկություններ ունի, որ ռուսական զինուժը թիրախավորում է արևելյան Ուկրաինայում հացահատիկի պահեստարանները․ «Մարտի վերջի դրությամբ նման հարձակումների հետևանքով վնասվել է առնվազն վեց պահոց», Reuters-ին հայտնել է աղբյուրը։

Ուկրաինան 2020/21 թվականներին հացահատիկ արտահանող չորրորդ երկիրն էր աշխարհում։

«Այս ամբարների վրա անխոհեմ հարձակումները վառ օրինակ են այն բանի, թե ինչպես է Պուտինի պատերազմն ուղղակիորեն ազդում Ուկրաինայի խաղաղ բնակիչների վրա և սպառնում է պարենային անվտանգությանն ամբողջ աշխարհում: Քանի որ Աֆրիկայի եւ Մերձավոր Արեւելքի երկրները կախված են ուկրաինական ցորենի ներկրումից, պահեստենրի ոչնչացումը կարող է հանգեցնել դեֆիցիտի եւ գների բարձրացման այդ առանց այդ էլ խոցելի տնտեսությունների համար», ասել է ամերիկացի պաշտոնյան։

ՌԴ Անվտանգության խորհրդի փոխնախագահ Դմիտրի Մեդվեդեւը Տելեգրամի իր ալիքում գրել է, որ Ռուսաստանը հացահատիկի ամենամեծ արտադրողն է, իսկ վերջին տարիներին՝ ցորենի խոշորագույն արտահանողը։ «Այնպես ստացվեց, որ շատ երկրների պարենային անվտանգությունը կախված է մեր մատակարարումներից։ Ստացվում է, որ մեր պարենը մեր լուռ զենքն է։ Լուռ, բայց՝ սարսափազդու», գրել է նա:

Նա գրել է, որ «կմատակարարենք միայն մեր բարեկամներին (բարեբախտաբար, նրանք շատ են եւ ընդհանրապես Եվրոպայում եւ Հյուսիսային Ամերիկայում չեն գտնվում): Մենք մեր մթերքներն ու գյուղմթերքը մեր թշնամիներին չենք մատակարարի»։

Մեդվեդեւը փաստորեն խոստովանել է, թե ինչու է Ռուսաստանը ոչնչացնում ցորենի պահեստները Ուկրաինայում՝ նրա շուկաները գրավելու եւ թշնամի Արեւմուտքին պատժելու համար։ Ռուսաստանը էներգակիրները, ցորենը համարում է ոչ թե համաշխարհային տնտեսությանն ինտեգրվելու եւ սեփական բարեկեցությունն ու զարգացումն ապահովելու միջոց, այլ զենք, որից Արեւմուտքը չի տուժելու երկարաժամկետ հեռանկարում։ Իսկ Ռուսաստանի համար հետեւանքներն առջեւում են, չնայած Մեդվեդեւի մանկամիտ խանդավառությանը։