Թուրքական լրատվամիջոցները ցանկանում էին մեղադրել Հայաստանին, սակայն «մերկացրեցին» Ադրբեջանին

fraza.com–ը գրում է, որ թուրքական լրատվամիջոցներն այնքան են տարվել  Ռուսաստանին Հայաստանի օգնության մեջ մեղադրելու մտքից, որ Ադրբեջանն է հայտնվել անհարմար իրավիճակում։ Թուրքական հեռուստաալիքը, փորձելով մեղադրել Հայաստանին Ռուսաստանին օգնելու մեջ, հրապարակել է Հայաստանում ռուսական «Էրեբունի» ավիաբազայից 4 միավոր Սու-30 Ռուսաստան ուղարկելու երթուղին, որից ցանկացած դիտող, տեսանյութը ուշադիր ուսումնասիրելով, կհամոզվի, որ ինքնաթիռները ոչ թե հայկական են, այլ ռուսական։

Փաստացի թուրքական լրատվամիջոցների ջանքերի արդյունքը հակառակ էֆեկտն է ունեցել, կադրերում պարզ երևում է, որ դրանք ռուսական, և ոչ թե հայկական, նույնականացման նշաններով ինքնաթիռներ են, և ամենակարևորը օգնության թռած այդ ինքնաթիռների երթուղին է, որն ըստ էության իրականացվում է Ուկրաինայի ռազմավարական դաշնակցի՝ Ադրբեջանի տարածքով։ Հեռուստաալիքի ներկայացրած երթուղու համաձայն պարզ երևում է, որ ինքնաթիռները դուրս են գալիս Հայաստանում ռուսական ավիաբազայից և Ադրբեջանի տարածքով թռչում դեպի Ռուսաստանի Դաշնության տարածք։ Առնվազն միամտություն է հավատալ նրան, որ Հայաստանի նկատմամբ թշնամաբար տրամադրված Ադրբեջանը կարող է հայկական մարտական ​​ինքնաթիռներ բաց թողնել իր տարածքով, և ակնհայտ է, որ այդ ռազմական ինքնաթիռները պատկանում են Ռուսաստանին։

Սա Հայաստանին մեղադրելու թուրքական և ադրբեջանական լրատվամիջոցների առաջին փորձը չէ, և փորձագետները դա կապում են Ադրբեջանի և Թուրքիայի, որոնք Ուկրաինայի ռազմավարական դաշնակիցներ են, իրենց արդարացնելու փորձերի հետ, քանի որ նրանք չեն միացել հակառուսական պատժամիջոցներին, իսկ Թուրքիան նույնիսկ փորձում է ապաստան տալ այն ռուս գործարարներին, որոնք տուժել են հակառուսական պատժամիջոցներից:

Ինչպես հայտնի է, ԵՄ-ի և ՆԱՏՕ-ի անդամ երկրների ռազմական կցորդները ավելի շուտ հայկական ինքնաթիռների վերաբերյալ ապատեղեկատվությունը  բացահայտել էին։ Նրանք մարտի 31-ին այցելել էին ՀՀ ՊՆ ավիաբազա, և համոզվել, որ Սու-30ՍՄ բոլոր 4 ինքնաթիռները տեղում են, իսկ շրջանառվող լուրերը ապատեղեկատվություն է: Այսինքն Ադրբեջանական և թուրքական մամուլում շրջանառվող Ուկրաինայում ռազմական գործողություններին հայկական ուժերի մասնակցության մասին տեղեկատվությունը չի համապատասխանում իրականությանը։ 

Նյութը հրապարակման պատրաստեց Կամո Խաչիկյանը