Ամուսնության առաջարկություն բեմից, ռոմանտիկա և հումոր․ 1000-րդ ArmComedy-ի հետաքրքիր դրվագները

Ամեն ուրբաթ ArmComedy յութուբյան ալիքում Նարեկն ու Սերգեյը ներկայացնում են նախագծի նոր թողարկումը, սակայն 1000-րդ թողարկմանը որոշել էին հետևորդներին հրավիրել Սունդուկյանի անվան ազգային ակադեմիական թատրոն՝ համատեղ նկարահանելու ArmComedy-ի նոր թողարկումը, ստուգելու նրանց իրական արձագանքները, ինչպես նաև, ներկայանալու սթեդափով։

Tert.am Life-ը ներկա է եղել երեկոյին ու առանձնացրել հետաքրքիր դրվագները։

«Ուրիշ հաճույք է շփվել մարդկանց հետ, որոնց միայն լայքով ես ճանաչում։ Շատ  լավ էներգիա ստացանք»,- ասաց Սերգեյը, Նարեկն էլ նկատեց․ «Մարդկանց  բնական ռեակցիան հասկացանք։ Քաղաքական այն գործիչները, որոնք մտածում էին՝  դե հիմա ցույց են տալիս, հո մարդիկ չեն ծիծաղում, ևս դա հասկացան:) Հիմա կտեսնեն՝ լիքը մարդ որ կտորների վրա է ծիծաղել»։

Թեև Հայաստանի քաղաքական իրականությունը թույլ տալիս է շատ թեմաներ ունենալ հումորի համար, տղաները հաճախ չեն ներկայանում սթենդափով։ «Պետք է ասելիք կուտակվի,- ասաց Նարեկը, ապա հավելեց, որ այս էտապում 2 սթենդափ է հասունացել,- Քանի որ շատ հյուրեր ունենք Ռուսաստանից, մայիսին ռուսերեն  սթենդափ կանենք, կներկայացնենք Հայաստանը»։

Բացի համատեղ ելույթը, որն այսօր արդեն կլինի ArmComedy-ի յութուբյան ալիքում, տղաները ներկայացան նաև անհատական սթենդափով։ Յուրաքանչյուրից հետաքրքրվեցինք, թե մյուսի սթենդափից որ մասն է առավել տպավորվել։

«Ամենահետաքրքիր կտորն այն էր, որ Նարեկը տրիկոյով վազում է։ Այդ պատկերը  չեմ կարողանում հանել գլխիցս»,- ասաց Սերգեյը, Նարեկն էլ առանձնացրեց իր համար հետաքրքիր հատվածը․ «Սերգեյը շատ բաներ վերհիշեց։ Ինձ համար ամենածիծաղելին  այն էր, որ եկեղեցին բողոքել էր Սերգեյի հոդվածից, որտեղ նա գրել էր, որ իրենք օրհնել են բյուջեն։ Ի դեպ, մտածում էի՝ կարո՞ղ ա հիմա տնտեսությունն ընկնում է, որովհետև չեն օրհնում բյուջեն»։

ArmComedy-ն հումորային նախագիծ է, բայց այս անգամ ռոմանտիկ զեղում էլ ուներ։ Տղաների հետևորդներից մեկը խնդրել էր բեմից ամուսնության առաջարկություն անել սիրելիին։

«1000 ArmComedy-ն մեկ կարող ենք մեզ նման բան թույլ տալ»,- ասաց Նարեկը, Սերգեյն էլ հավելեց․ «Մենք նպաստում ենք ընտանիքների ստեղծմանը»։ Հումորիստը չմոռացավ հիշեցնել, որ ինքն ու Նարեկը նաև հարսանիքներ են վարում։

Երեկոն եզրափակվեց Նարեկի երաժշտական կատարումներով։