Նոր մանրամասներ երիտասարդ ընտանիքի զոհվելու դեպքից

«ՓԱՍՏԻՆՖՈ»

Հունվարի 8-ին Արմավիրի մարզի Մուսալեռ գյուղում երիտասարդ ընտանիքի թունավորման դեպքով «Փաստինֆո»-ին նոր տեղեկություններ են հայտնի դարձել: Հիշեցնենք, որ երիտասարդ ընտանիքի մահվան մասին հայտնի դարձավ հունվարի 8-ին՝ նրանց մարմինները հայտնաբերելով վարձակալված բնակարանում։
Մեր տեղեկություններով՝ կարծես թե հիմնավորվում է երիտասարդ ամուսիններ՝ Հրաչ Բաղդասարյանի, նրա կնոջ Աննա Միսակյանի և նրանց մանկահասակ երեխայի մահվան պատճառ դարձած շմոլ գազից թունավորման վարկածը:
«Փաստինֆո»-ին հաջողվեց պարզել, որ այն տունը, որտեղ հայտնաբերվել են երիտասարդ ընտանիքի անդամների մարմինները վարձակալել էր տղայի մայրը եւ դեպքին նախորդող օրերին՝ հունվարի 5-ին էր որդու ընտանիքը տեղափոխվել մոր մոտ՝ ժամանակավոր բնակության։ Տունը տաքացնելու համար տղան առաջարկել է խորդանոցից բերել գազի վառարանը, ինչին ընդդիմացել է մայրը, քանի որ չեն ունեցել խողովակները։ Այդուհանդերձ՝ տղան վառարանը խորդանոցից բերել է, միացրել գազին և փորձարկել, որից հետո մայրն անջատել է այն։
Հաջորդ օրը տղայի մայրը Երևան է եկել եւ վերադարձել հունվարի 7-ին՝ երեկոյան, սակայն որդու հետ որեւէ կերպ չի հաջողվել կապ հաստատել. վերջինս չի պատասխանել ոչ հեռախոսազանգերին եւ ոչ էլ դռան թակոցներին։ Կարծելով, որ քնած են մայր այդ օրը գիշերել է ընկերուհու տանը, իսկ հունվարի 8-ի առավոտյան նորից չկարողանալով գտնվել որդուն՝ դուռը փակվելու մասին տեղեկացրել է տանտիրոջը եւ փորձել նրա օգնությամբ դուռը բացել, ինչը չի հաջողվել։ Ապա՝ նկատել են, որ գազի հաշվիչը պտտվում է եւ անմիջապես փակել են գազը ու զանգել 911: Փրկարաների գալուց հետո տղային և հարսին հայտնաբերել են գետնին, իսկ թոռնիկին՝ սենյակում, անկողնու մեջ։ Տատիկը վերցրել է թոռանը և շտապօգնության մեքենայով շտապել հիվանդանոց, սակայն փոքրիկն արդեն մահացած է եղել, եւ նրա կյանքը փրկել չի հաջողվել։
Քննչական կոմիտեն ավելի վաղ տեղեկացրել էր, որ դեպքի առիվ հարուցվել է քրեական գործ՝ ՀՀ քրեական օրենսգրքի 279-րդ հոդվածի 3-րդ մասով:
Նշենք նաև, որ մահացած Աննա Միսակյանը հանդիսանում էր Էքստրասենս Անի Մաջնունյանի սպանության գործով կարևոր վկա: