Գագիկ Սուրենյանը հանդես է եկել լավ լուրով

«Ներկա պահին հանրապետության բոլոր շրջաններում, բացառապես Արարատյան դաշտի և Երևանի, օդի ջերմաստիճանը երեկվա նույն ժամի համեմատ մոտ 15 աստիճանով բարձրացել է»,- այս մասին այսօր լրագրողների հետ հանդիպման ժամանակ ասել է ՀՀ ԱԻՆ Հիդրոմետ ծառայության օդերևութաբանության կենտրոնի պետ Գագիկ Սուրենյանը: «Տաք օդի հոսանքն այնքան ակտիվ է, որ Իջևանի, Գորիսի հատվածում արդեն գիշերը բացասական ջերմաստիճան չի եղել, +4 +5 է եղել, իսկ առավոտյան ժամը 10:00-ին արդեն +10 աստիճան էր: Այսօր կեսօրից հետո հանրապետությունը կզգա այդ Միջերկրածովյան ցիկլոնի ազդեցությունը: Այսօր կեսօրին և ամսի 26-ին մենք կգտնվենք դրա ծայրամասերում, կեսօրից հետո հատկապես հանրապետության արևմտյան թևում ձյուն կտեղա, մասնավորապես` Շիրակում, Արագածոտնում, Կոտայքում, Արարատում, Արմավիրում, Վայոց Ձորում և Երևանում: Տեղումները կլինեն թույլ և միջին ինտենսիվության, բայց այն կշարունակվի մինչև հունվարի 26-ը: Հունվարի 26-ի լույս 27-ի գիշերը մոտենում է ցիկլոնի կենտրոնն` ընդգրկելով ամբողջ Կովկասը: Հունվարի 27-ին և 28-ին հանրապետությունը գտնվելու է այդ ակտիվ ցիկլոնի ազդեցության գոտում: Բոլոր շրջաններում ժամանակ առ ժամանակ կտեղա ձյուն, լեռնային շրջաններում այն կուղեկցվի բքով, քամու ուժգնացմամբ մինչև 15-20մ/վ արագությամբ, ցածր հորիզոնական տեսանելիությամբ, ճանապարհները կպատվեն մերկասառույցով: Հունվարի 29-ի գիշերը ձյան տեղումները կպահպանվեն, հունարի 29-ի առավոտյան ժամերից արդեն ցիլոնը կսկսի ուժը կորցնել և տեղումների ինտենսիվությունը կփոքրանա, իսկ հունվարի 30-ին այն դուրս կգա մեր հանրապետության տարածքից»: Գագիկ Սուրենյանը նշել է նաև, որ նկատվող տաք օդիային ներհոսքը հանրապետության տարածքում գիշերն առավել կակտիվանա: «Հանրապետության բոլոր մարզերում, նաև Արարատյան դաշտում և Երևանում օդի ջերմաստիճանը հատկապես գիշերային ժամերին 26-ից 27-ն ընկած ժամանակահատվածում ևս 8-10 աստիճանով կբարձրանա: Եթե այս օրերին մայրաքաղաքում և Արարատյան դաշտում գիշերային ժամերին միջինը -13 -15 աստիճան էր, ապա այս գիշեր կլինի -6 -8 աստիճան, իսկ 27-ի գիշերը` -5 -7 աստիճան: Ցերեկային ժամերին ջերմաստիճանը հիմնականում կլինի -2 -4 աստիճանի սահմաններում, որը նորմայի մեջ է»,- եզրափակել է նա: