Աշակերտները դաժան ծեծի են ենթարկել իրենց դասարանցուն ու նկարահանել դա․ Տեսանյութ

Մերձմոսկովյան Ժուկովսկի քաղաքում դասերից հետո 6-րդ դասարանի 4 աշակերտ դաժան ծեծի են ենթարկել իրենց համադասարանցուն: 4 տղաներից մեկը տեսանկարահանել է իր ընկերների կողմից իրականացվող դաժանություններն, իսկ մյուս 3 տղաները ոտքերով բազմաթիվ հարվածներ են հասցրել տղայի գլխի ու որովայնի շրջանում: Այդ ամենն ընթացել է 10-յակ վկաների ծիծաղի ու վանկարկումների ներքո:
Իրենց իսկ իրականացրած վայրագությունները նկարահանող տղան հայտարարել է, թե այդ տեսանյութը կտարածվի ու հանրահայտ կդառնա սոցցանցերում, իսկ 13-ամյա տղան Youtube-ի հերոս կդառնա:
Վերջին հարվածը տղան ստացել է դեմքի շրջանում ու ուշագնաց եղել: Այդ վիճակում նա մնացել է մի քանի րոպե: Ներկաներից մեկն, ի վերջո, խղճացել է տղային ու նրան տեղափոխել դպրոց: Դրանից հետո ուսումնական հաստատության աշխատակիցները ոստիկանություն և շտապօգնություն են կանչել, նաև հրավիրել են անչափահասների ծնողներին:
Նշվում է, որ տեսանյութը հայտնվել է Вконтакнте սոցիալական ցանցի փակ խմբերից ու զրուցարաններից մի քանիսում:
Տուժած տղային հոսպիտալացրել են, նա գանգուղեղային բազմաթիվ վնասվածքներ, ոտքի հոդախախտ և մարմնի վրա բազմաթիվ վերքեր է ստացել:
«Դե տղաներ են, նրանց հատուկ է կռիվներ անելը, բայց այս պատմության մեջ ամենասարսափելին այն է, որ ներկաներից և ոչ մեկն օգնություն չի կանչել ու չի միջամտել»,- ասել է տուժած տղայի մայրը: