«Մեյդ ին Արմենիա» ՀԿ-ն ներկայացրել է ՓՄՁ-երին համապարփակ աջակցության ծրագիրը

Հուլիսի 7-ին «Մեյդ ին Արմենիա» ՀԿ փոքր և միջին ձեռնարկատիրության աջակցման ծրագրի շնորհանդեսն էր, որին ներկա էին պաշտոնյաներ, փոքր և միջին ձեռնարկությունների ներկայացուցիչներ, ամենատարբեր ընկերությունների հիմնադիրներ, հյուրեր:

ՀԿ-ն ստեղծվել է նախորդ տարեվերջին՝ ՓՄՁ-երին համապարփակ աջակցության տրամադրման, վաճառքի ու արտահանման խթանման նպատակով, ինչը, վերջնարդյունքում, կնպաստի ՀՀ տնտեսության զարգացմանը: ՀԿ համահիմնադիրներն են Աշոտ Գրիգորյանը և Մարիա Վարդանյանը:

«Մեյդ ին Արմենիա» ՀԿ համահիմնադիր, նախագահ Աշոտ Գրիգորյանի խոսքով,ՀԿ-ն գործունեության կարճ ընթացքում սկսել է փորձագիտական աջակցություն տրամադրել փոքր և միջին ձեռնարկություններին, աջակցել տարբեր ոլորտներում ծառայություններ մատուցող ընկերությունների հետ կապերի ստեղծմանը: «Վստահ ենք` ուժեղացնելով փոքր և միջին ձեռնարկությունները, նպաստելու ենք Հայաստանի տնտեսական զարգացմանը: Մեր նպատակների իրագործման հարցում մեզ աջակցում են Հայաստանում և արտերկրում հայկական արտադրանքի առցանց վաճառքով զբաղվող, լոգիստիկ և մարքետինգային ծառայություններ մատուցող ընկերությունները»,-նշեց նա:

ՀՀ էկոնոմիկայի փոխնախարար Ռաֆայել Գևորգյանը ընդգծեց` հնարավոր չէ մշակել և իրականացնել արդյունավետ պետական քաղաքականություն`երկխոսության մեջ չլինելով մասնավոր հատվածի հետ, ընդ որում` այդ երկխոսությունը պետք է անընդհատ լինի: «Որդեգրել ենք ժողովրդավարության ճանապարհը, դրա կայացման համար առանցքային դեր ունի փոքր և միջին ձեռնարկատիրության կայացումը, դա ստեղծում է միջին խավ, ինչն էլ իր հերթին բերում է ներառական քաղաքական համակարգին: Այս խնդիրը դրված է Կառավարության առջև»,-հավելեց փոխնախարար Գևորգյանը` ներկայացնելով, թե ինչ ուղի է ընտրել ներկայիս Կառավարությունը մեր երկրում փոքր և միջին ձեռնարկատիրությունը զարգացնելու համար:

Էկոնոմիկայի փոխնախարար Արմեն Արզումանյաննառանձնացրեց պետության անելիքներն արտասահմանյան գործընկերների հետ համագործակցության առումով: Նրա կարծիքով` տնտեսական դիվանագիտության ինստիտուտը առայսօր կայացված չէ: «Հիմա փորձում ենք այդ ինստիտուտը զարգացնել: Եթե ունենում ենք բանիմաց մասնագետներ, որոնք կարողանում են մեր արտադրանքը ներկայացնել արտերկրում, դա հստակ օգուտ է տալիս: Ունենք խնդիրներ լոգիստիկ առումով: Հասկանում ենք, թե որտեղ ենք ապրում, բայց պետք է զարգացնել Հայաստանի լոգիստիկ ցանցը: Հայաստանն աշխարհին ներկայացնելու նոր ոճ պետք էորդեգրենք»,-վստահ է էկոնոմիկայի փոխնախարարը՝ նշելով, որ արդեն շուտով Հայաստանը դեպի Եվրոպա ու ՌԴ արտահանման կազմակերպման նպատակով կունենա երկու կամ երեք լաստանավ:

Առևտրաարդյունաբերական պալատի գործադիր տնօրեն Անդրանիկ Ալեքսանյանը նախանշեց այն քայլերը, որոնց շնորհիվ հայ արտադրողները կկարողանան իրենց արտադրանքը դուրս բերել միջազգային շուկա: «Պալատը մոտ 100 երկրի հետ պայմանագիր ունի, այն է` համագործակցություն պալատների մակարդակով: Ունենք հնարավորություն նամակ գրել կոնկրետ երկրի պալատին, ասել` նման ապրանք ունենք, թույլ տվեք ձեր շուկա մտնել, ինչպես նաև ստանալ մի շարք հարցերի պատախաններ: Պատրաստ ենք համագործակցել փոքր և միջին կազմակերպությունների հետ»,-ասաց Ալեքսանյանը: Այնուհետև դիմեց ՓՄՁ-ների ներկայացուցիչներին` ձևակերպեք, թե ինչ եք ուզում: «Մի բերեք մեզ երրորդ երկրի ապրանք և փորձեք համոզել, որ այն հայկական է, այդ ժամանակներն անցել են: Եթե դժվարություններ կլինեն, պատրաստ ենք օգնել խորհրդատվությամբ»,-հավելեց Առևտրաարդյունաբերական պալատի գործադիր տնօրենը:

«Export Armenia» ասոցիացիայի համահիմնադիր Նարեկ Ալեքսանյանը խոսեց արտահանման մասին` ընդգծելով, որ արտահանումն ապրանքի մասին չէ, նույնիսկ որակյալ ապրանքի մասին չէ, Հայաստանի դեպքում արտահանումը մարդու մասին է: «Եթե մոտակա 2-3 տարվա ընթացքում չունենանք մինչև 500 մասնագետ, որոնք հստակ կարող են 3-ից 4 լեզվով, լայն աշխարհագրությամբ բանակցել, տիրապետել թվային գործիքների, ապա առաջ չենք գնալու, զարգացում չենք ունենալու: Արտահանման պարագայում կարևոր գործոն է վաճառքը: Կարևորեք այն մարդկանց, որոնք զբաղվում են ձեր ապրանքի վաճառքով: Թիրախավորեք այն երկրները, որտեղ ձեր ապրանքը կարող է երկար վաճառվել: Հաջորդիվ` այդ երկրի լեզվին, մշակույթին տիրապետող մասնագետներ ներգրավվենք:Ի վերջո, կայուն որակ ապահովենք»,-ասաց Ալեքսանյանը: Ընդգծեց` կարևոր են նման քննարկումները, որոնց ընթացքում վեր են հանվում խնդիրները, լուծումներ առաջարկվում, նոր գաղափարներ հնչեցվում:

Միջոցառմանը ներկա էին հայկական մի քանի ընկերությունների հիմնադիրներ: «Mountea» ընկերության հիմնադիր Դավիթ Մնացականյանը ներկայացրեց սեփական բիզնես սկսելու իր փորձը: Անդրադարձավ արտահանմանը: «Շուկաները տարբեր են, բայց վերջին շրջանում մի կարևոր բարդության ենք բախվել` դոլարի և եվրոյի կուրսն ընկավ, չես կարողանում այնպես հաշվարկներ անել, որ քո շահույթը դարձնես դրամ և օգտագործես: Ստիպված ես բարձր տոկոսադրույքով վարկ վերցնելու տարբերակն ընտրել, ինչ-որ ձևով քո կազմակերպության շրջանառությունն ապահովել»,-շեշտեց Մնացականյանը:

Սուրճի և թեյի արտադրությամբ զբաղվող «Afrobean» ընկերության հիմնադիր Քրիստ Մարգարյանընշեց` «Մեյդ ին Արմենիան» իրենց հնարավորություն է տվել դուրս գալ միջազգային շուկա: «Արդեն կան նախնական համաձայնություններ և պլաններ արտահանել մեր արտադրանքը, ուղարկել ենք այն մոտ տասը երկիր, սպասում ենք պատասխանի, անցնում ենք սերտիֆիկացման բոլոր փուլերը: ՀԿ-ն մեզ տվեց կապեր և հնարավորություններ: Նոր բիզնեսը չի կարող միայնակ հաղթահարել բոլոր խնդիրները, որոնք առաջանում են` լոգիստիկ, վաճառքի, մարքեթինգային և այլն: Անպայման շուկայի վերլուծություն արեք, թիրախային ճիշտ խումբ ընտրեք, փորձեք դիրքավորում ունենալ»,-ասացՄարգարյանը:

«Yan cosmetics»-ի հիմնադիր Սիլվա Մալխասյանը տեղեկացրեց` առաջինն էին, որ շուկայում ներկայացան հայկական արտադրության դեկորատիվ կոսմետիկայով: «Երբ ցանկանում էինք ընդլայնել մեր ապրաքատեսականին, չէր բավականացնում ոչ ժամանակը, ոչ միջոցները: Սկսեցինք համագործակցել «Մեյդ ին Արմենիա» ՀԿ հետ, որն էլ մեզ օգնեց գտնել պոտենցիալ գործընկերներ, որոնք մեզ օգնում ենք լոգիստիկ, մարքենտինգային և արտահանման հարցերում: Եվ ամենակարևորը` ՀԿ-ն մեզ օգնեց գտնել ներդրող, ում օգնությամբ իրականություն ենք դարձնում մեր նպատակները»,-եզրափակեց Մալխասյանը:

Միջոցառումը ավարտվեց «Blockcentro» ընկերության  Գործադիր տնօրեն Քրիստիանո Վոլպիի/ Իտալիա/ զեկույցով, որը ներկայացրեց ՀԿ հետ համագործակցության շրջանակում իրականացվող նախագծերը: Մասնավորապես, նրա խոսքով, այժմ ակտիվ քայլեր են կատարվում ՓՄՁ-երին ընդգրկուն աջակցության տրամադրման նպատակով բիզնես աքսելերատորի ստեղծման, ինչպես նաև բլոկչեյն տեխնոլոգիաների վրա հիմնված ֆինանսավորման գործիքի ներդրման ուղղությամբ: Սրանք դառնալու են այն գործիքները, որոնք օգնելու են ավելի արդյունավետ օգտագործել ՓՄՁ-երի ներուժը, խնայել ժամանակ, ռեսուրսներ՝ լուծելով տարբեր խնդիրներ, այդ թվում՝ ստանալ հավելյալ ֆինանսական ռեսուրսների ներգրավման հնարավորություն:

Միջոցառումն իրականացվել է Telesis Solusions, OMNI, Shopping Armenia, AllinOne ընկերությունների աջակցությամբ և նրանց հետ գործակցությամբ: