Բացահայտումներ Մոսկվայից

Մերձավոր Արևելքի և Կովկասի հարցերի փորձագետ Ստանիսլավ Տարասովը «Առաջին լրատվական»-ի հետ զրույցում հայտարարեց, որ իր տեղեկություններով՝ վերջին շրջանում Մոսկվայի նախաձեռնությամբ Հայաստանի և Ադրբեջանի հետ քննարկվել է ղարաբաղյան հակամարտության կարգավորման որոշակի ծրագիր, ըստ ամենայնի՝ դա Կազանի փաստաթուղթն է, բայց նախաձեռնությունը տապալվել է Ադրբեջանի ջանքերով: Ադրբեջանի «Լիդեր» հեռուստաընկերության լրագրողը, Տարասովի խոսքով, իր հայտնի հարցով սադրել է ՌԴ արտգործնախարար Սերգեյ Լավրովին հայտարարելու, որ պատերազմը Ղարաբաղի դեմ Ադրբեջանի ներքին գործը չէ, ինչի հետևանքով «իրավիճակը զրոյացվել է»:

Փորձագետը խոսեց նաև նոր պատերազմի հավանականության մասին՝ կարծիք հայտնելով, որ Ադրբեջանին թույլ չեն տա նոր պատերազմ սկսել, քանի որ Մոսկվան այս անգամ չեզոք չի մնա, ինչպես արեց նախորդ տարվա ապրիլին:

Ստանիսլավ Տարասովը այս մեկնաբանությունը տվեց Մոսկվայում Ռուսաստանի և Ադրբեջանի արտաքին գործերի նախարարների հանդիպման առիթով:

- Պարոն Տարասով, ինչո՞վ է ավելի շատ պայմանավորված Մամեդյարովի այցը Մոսկվա՝ ռուսական կողմի հրավերով:

- Կարդացեք ՌԴ ԱԳՆ-ի պաշտոնական հաղորդագրությունը Մամեդյարովի այցի մասին: Տեքստը շատ «ժլատ» է: Այնտեղ կան նոր ձևակերպումներ, նշվում է, որ քննարկվել են Վիեննայի և Սանկտ Պետերբուրգի պայմանավորվածությունների կատարմանը առնչվող թեմաներ: Նախկինում նշվում էր դրանց կատարման անհրաժեշտության մասին, այսինքն՝ Մոսկվան այժմ չի թաքցնում, որ Բաքուն չի ստորագրել Վիեննայի և Սանկտ Պետերբուրգի համաձայնությունների տակ: Սա՝ առաջինը:

Երկրորդը, սա կարծես դիվանագիտական մարաթոն է. նախ Նալբանդյանը եկավ, հետո՝ Մամեդյարովը, դրանից հետո Կուրցը եղավ Մոսկվայում: Ըստ երևույթին, քննարկվել է ինչ-որ նախագիծ, ծրագիր: Մեր տեղեկություններորվ՝ այնուամենայնիվ, կողմերը վերադարձել են Կազանի փաստաթղին, և ադրբեջանցի լրագրողը, փաստորեն, սադրեց Լավրովին անկեղծ հայտարարության, որ պատերազմը Ադրբեջանի ներքին գործը չէ: Այդպիսով իրավիճակը զրոյացվեց, օպերացիան ձախողվեց և կողմերը փաստորեն սկսեցին գործել զրոյից:

Ե՛վ նախագահ Ալիևը, և՛ նախագահ Սարգսյանը հայտարարություններ էին անում Ղարաբաղի մասին, ընդ որում այդ հայտարարությունները արտաքնապես մոտիվացված չէին տեղեկատվական առումով, իսկ հիմա պարզ է դառնում, որ այդ ծրագրի մասին իմացել են միայն որոշակի թվով մարդիկ, բայց նախագիծը տապալվել է, որովհետև ադրբեջանական կողմը որոշել է չգնալ զիջումների և դա առաջացրել է Լավրովի դժգոհությունը:

Իրավիճակը այսպիսով բարդ է: Կտեսնենք, թե ինչպես կզարգանան իրադարձությունները հետագայում, բայց ընդհանուր առմամբ՝ ստատուս-քվոն պահպանվում է:

Շարունակությունն՝ այստեղ