Արա Աբրահամյանը որոշել է վրեժ լուծել

SHAME.AM-ը գրում է․

Շատերն անմիջապես նկատեցին, որ վարչապետ Կարեն Կարապետյանի՝ Մոսկվայում հայ գործարարների հետ հանդիպմանը բացակայում էր Ռուսաստանի հայերի միության նախագահ Արա Աբրահամյանը։ Իսկ հետո, երբ հրապարակվեց այն 30 գործարարների ցանկը, որոնք պատրաստվում են ներդրումներ կատարել Հայաստանում, Աբրահամյանի անունը վերստին չկար: Այս բացակայությունը ոչ այնքան վշտացրեց մարդկանց, որքան հետաքրքրասիրություն շարժեց: Եվ դա բնական էր:

Արա Աբրահամյանը, որ ընդամենը շաբաթներ առաջ հայտարարում էր, թե հրաժարվում է զբաղվել քաղաքական գործունեությամբ և այսուհետ իր ամբողջ ջանքն ու եռանդը ներդնելու է հայրենիքի բարգավաճման գործին, փաստորեն առաջին իսկ հնարավորության դեպքում խուսափեց հայրենիքի նվիրյալ ծառան լինել: Եվ դա կանխատեսելի էր երկու իմաստով: Նախ, Արա Աբրահամյանը պիտի վերջնականապես հստակեցնի, թե որն է իր իրական հայրենիքը, և հետո Հայաստանի իշխանություններից մինչև հոգու խորքը նեղացած գործարարից պետք է սպասել ոչ թե մասնակցություն, այլ վրեժխնդրություն:

Իսկ Աբրահամյանն իր ոխը որոշել է հանել շատ յուրահատուկ ձևով: Տեղեկություններ կան այն մասին, որ այս օրերին Ռուսաստանի հայերի միության նախագահը բացահայտ կերպով աջակցում է Սեյրան Օհանյան-Վարդան Օսկանյան տանդեմի առաջնորդած շարժմանը։ Հիմա արդեն հասկանալի է դառնում, թե ինչու այդքան մեծ արագությամբ դեպի հիշյալ դաշինքը ձգվեց նաև Արա Աբրահամյանի տեղակալը՝ Հայաստանի դեմոկրատական կուսակցության նախագահ Արամ Գ. Սարգսյանը: Լուրեր են շրջանառվում, որ Սեյրան Օհանյանը Մոսկվայում վերջերս հանդիպում է ունեցել Աբրահամյանի հետ, ով ֆինանսապես խոստացել է աջակցել նրան: Ճիշտ է, Աբրահամյանը գուցե թե հոգու խորքում այնքան էլ չի հավատում Օհանյան-Օսկանյան դուետի հաջողությանը, սակայն բարկությունը նրան այնքան է կուրացրել, որ պատրաստ է իր փողերը քամուն տալ, միայն թե կարողանա կսմթել Հայաստանի վերնախավին: