«Իմ խոսքերի ապացույցներն ունեմ: Կգա ժամանակը՝ դրանք կհրապարակեմ»․ փաստաբան

«Փաստ» օրաթերթը գրում է.

Արդեն տեղեկացրել ենք, որ փետրվարի 11–ին Փաստաբանների պալատում տեղի են ունենալու պալատի խորհրդի ընտրություններ, որին մասնակցելու դիմում են ներկայացրել ՓՊ նախկին նախագահ Ռուբեն Սահակյանը և պալատի նախկին գլխավոր հաշվապահ Կարինե Սարգսյանը: Նշված անձերի մասնակցությունն այնքանով է ուշագրավ, որ Սահակյանի պահանջով քրեական գործ կա հարուցված՝ Կարինե Սարգսյանի կողմից ֆինանսական չարաշահումներ կատարելու փաստի արթիվ և այս պահին նախաքննություն է ընթանում:
«Փաստ» օրաթերթի փետրվարի 3–ի` թիվ 18–ում մենք արդեն ներկայացրել ենք պալատի նախկին գլխավոր հաշվապահի տեսակետը: Հավասարության սկզբունքը չխախտելու համար այս անգամ ներկայացնում ենք Փաստաբանների պալատի նախկին նախագահ Ռուբեն Սահակյանի տեսակետը:
«Փաստի» հետ զրույցում Ռուբեն Սահակյանը տեղեկացրեց, որ պալատի նախկին գլխավոր հաշվապահի գործողություններում հանցակազմի հատկանիշներ տեսնելով և նկատի ունենալով, որ Կարինե Սարգսյանը մամուլում զրպարտչական լուրեր է տարածել իր մասին, դիմել է գլխավոր դատախազություն, հրապարակման մեջ նշվածի փաստի առթիվ քրեական գործ հարուցելու խնդրանքով : Իր դիմումի հիման վրա հարուցվել է քրեական գործ և ներկա պահին նախաքննությունը դեռևս շարունակվում է:
«Ես հույս ունեմ, որ կիրականացվի օբյեկտիվ քննություն, որի արդյունքում ամեն ինչ կբացահայտվի: Ես հետամուտ եմ լինելու, որ մեղավորները պատասխան տան: Ես անգամ արդարանալու որևէ անհրաժեշտություն չունեմ, ինձ ճանաչող, իմ գործունեությանը ծանոթ բոլորին ամեն ինչ պարզ է: Իսկ տարածվող զրպարտությունների աղբյուրն ու դրդապատճառը ինձ համար արդեն պարզ է, իմ խոսքերի ապացույցներն ունեմ: Կգա ժամանակը ես դրանք կհրապարակեմ»,– ասաց Ռ. Սահակյանը:
Նա նաև նշեց, որ իր ձեռքի տակ եղած փաստերի մի մասն արդեն ներկայացրել է նախաքննական մարմին, որտեղից շատ բան պարզ է դառնում: Ինչ վերաբերվում է պալատի նախկին գլխավոր հաշվապահ Կարինե Սարգսյանի հայտարարություններին, որոնք նա հնչեցրել է նաև «Փաստի» հետ զրույցում, ապա Ռ.Սահակյանը դրանց անգամ անդրադառնալ չի ցանկանում, քանի որ դրանց ծանոթացող ցանկացած մարդու համար էլ ակնհայտ է, որ դրանցում որևէ տրամաբանության նշույլ չկա:
«Այդ գումարները 100 դրամ չեն, 1000 դրամ չեն, մեկ միլիոն դրամ չեն, տասնյակ միլիոնների մասին է խոսքը: Դրանից հետո Սահակյանը գնաց պալատից, իսկ ինչո՞ւ Կարինե Սարգսյանը չասաց՝ Սահակյան, բա փողե՞րը: Դու գնում ես, բա ինչո՞ւ ես ինձ այդքան պակասորդի հետ թողնում միայնակ: Ես մի անգամ նրան հանդիպեցի փողոցում և հարցրեցի՝ Կարինե, ի՞նչ խղճով ես ինձ զրպարտում: Նա պատասխանեց՝ բա ի՞նչ անեմ, երեխաներս դուրսը մնա՞ն»,– ասում է Ռ. Սահակյանը:
Ռ. Սահակյանին ոչ միայն հանգիստ չի տալիս, այլև շատ է հուզում հարցը, թե ինչպես կարող էր Կ. Սարգսյանն իրեն զրպարտել:
«Այդ հարցի պատասխանը նախաքննությունն է տալու՝ ակամայից: Կգա օրը, ես մատս կդնեմ այդ հարցերի պատասխանների վրա և բոլոր այն մարդիկ, ովքեր վայրահաչում են, որ ես առնչություն ունեմ այդ պակասորդի հետ, կլռեն: Կգա ժամանակը, որ ես կներկայացնեմ այն փաստական տվյալները, որոնք կվկայեն շատ բաների մասին»,– ասաց Ռ. Սահակյանը:
Նա նաև նշեց, որ առնվազն 60 զանազան բնույթի փաստական տվյալ կա իր ձեռքի տակ, որոնք կվկայեն այն մասին, որ ինքը որևէ առնչություն չունի պալատում հայտնաբերված պակասորդի հետ և չէր կարող այդ մասին տեղյակ լինել, բացի այդ իր անունը այդ ամենի հետ կապվում է հատուկ ուղղորդմամբ:
«Իմ առնչությունը միայն այն է, որ դա եղել է իմ և պալատի ներկայի նախագահի պաշտոնավարման օրոք: Ես ցավում եմ, որ այս օրերին պալատի խորհրդի անդամության որոշ թեկնածուներ չտիրապետելով փաստերին, իսկ որոշ դեպքերում լավ էլ տեղյակ լինելով, որ դա զրպարտություն է, շահարկում են այն իրենց նախընտրական նպատակներով, բայց նաև վստահ եմ, որ ժամանակը կգա և ամեն ինչ իր տեղը կընկնի»,– ասաց Փաստաբանների պալատի նախկին նախագահը:

Շարունակությունը` «Փաստ» օրաթերթի այսօրվա համարում: