Հաճախ համբուրվելու բարերար ազդեցությունը․ մեկնաբանում է մասնագետը

Պարզվում է՝ մեր գենոտիպը հակված է տրվելու դեպրեսիաների: Ինչի՞ց է առաջանում դեպրեսիան և ինչպե՞ս ազատվել դրանից: MAMUL.am-ի զրուցակիցն է բժիշկ-սեքսոպաթալոգ Վրեժ Շահրամանյանը. «Հայտնի է, որ աշնան և ձմռան ամիսներին մարդիկ դեպրեսիայի հանդեպ առավել զգայուն են դառնում: Այդ ամիսներին արևի ճառագայթների սակավությունը հանգեցնում է մարդու օրգանիզմում «արտադրվող» լավ, դրական տրամադրության հորմոնների նվազման, ինչի արդյունքում մարդիկ հաճախ լինում են մռայլ, մելամաղձոտ, սակավաշարժ և անաշխատունակ», -պարզաբանեց Վրեժ Շահրամանյանը: Նրա հավաստմամբ՝ դեպրեսիաներ կարող են առաջացնել ալկոհոլի, թմրանյութերի չարաշահումը, որոշակի ծանր հիվանդությունների հետ կապված երկարատև, հուսահատ վիճակը, որոշ դեղամիջոցների ազդեցությունը: «Ձեզ քաղցրից մի զրկեք: Ձմեռային դեպրեսիայից ազատվելու լավ միջոց է մուրաբան: Բանն այն է, որ նրա մեջ 65 տոկոս գլյուկոզ է պարունակում, և լիովին զուրկ է ճարպերից: Բայց օրգանիզմի քմահաճույքներին շատ էլ մի տրվեք, ձմռանը գիրանալը շատ հեշտ է: Եվ ամենակարևորը՝ հաճախակի համբուրվեք, մի՛ թողեք, որ տխրությունը ձեզ տիրի»,- ասաց Վրեժ Շահրամանյանը: Դեղամիջոցներ ընդունելու փոխարեն մասնագետը խորհուրդ տվեց այցելել ընկերներին հենց այնպես, առանց որևէ առիթի: «Եթե շուն եք պահում, նրան զբոսանքի տարեք: Բաղնիք, լողավազան կամ մերսման գնացեք: Նորմալ սնվեք՝ օրական չափաբաժնում ներառելով մեղր, միս, ձուկ, ձու, ձիթապտղի յուղ: Եղե՛ք առողջ և երջանիկ», - ամփոփեց մասնագետը: