Ալիեվին հհրապարակավ ծաղրել են Եվրահանձնաժողովում

«ԼՐԱԳԻՐ»-ը գրում է․

Ինչ գին է վճարել Ադրբեջանը Եվրոպայի հետ համաձայնության համար

Ադրբեջանի նախագահ Իլհամ Ալիեւը մեկնել է Բրյուսել: Ադրբեջանական լրատվամիջոցները ներբողներ են ձոնում «մեծ նախագահին»՝ գլխավոր ձեռքբերում ներկայացնելով Հարավային գազային միջանցքի հարցի համաձայնեցումը, որի միջոցով Ալիեւը մտադիր է միլիարդների վարկ ներգրավել:
Սակայն, անգամ ադրբեջանական թերթերը չեն կարող թաքցնել, որ Եվրոպայում ուրախ չեն տեսնելու Ալիեւին: Եվրախորհրդարանում չի կայացել Ալիեւի հանդիպումը, որտեղ նրան սպասում էին ադրբեջանցի ընդդիմադիրները: Ադրբեջանական թերթերը գրում են, որ Եվրախորհրդարանում սադրանք է նախապատրաստվել Ալիեւի դեմ:
Եվրահանձնաժողովի նախագահ Ժան-Կլոդ Յունկերն էլ չի թաքցրել, որ չի ցանկանում հանդիպել Ալիեւին: Ճեպազրույցի վերջում նա ասել է, որ «օրվա լավ մասն ավարտվեց, որովհետև գնում է հանդիպելու Ալիեւին»:
Ալիեւը, որը վերջին շրջանում Ռուսաստանի խաղում էր ղարաբաղյան հակամարտության հարցով, ըստ երեւույթին, «հիասթափվել է» Մոսկվայից: Հունվարյան մամուլի ասուլիսի ժամանակ Ռուսաստանի արտաքին գործերի նախարար Սերգեյ Լավրովը հայտարարել էր, որ Ալիեւը «հակաահաբեկչական գործողության» քարտ բլանշ չի ստանա, ղարաբաղյան խնդիրն Ադրբեջանի ներքին գործը չէ, եւ Մոսկվան պնդում է, որ միջադեպերի հետաքննությունների մեխանիզմներ ներդրվեն:
Դրանից հետո Բաքուն փորձել է լարել դրությունը սահմանին, Մոսկվա է այցելել Ադրբեջանի արտաքին գործերի նախարար Էլմար Մամեդյարովը, որը Բաքու վերադառնալիս ասել է, որ դժգոհ է Լավրովի հետ հանդիպումից: Հետո Ալիեւը մեկնել է Բրյուսել եւ պայմանվորվել գազային միջանցքի շուրջ:
Ի՞նչ գին է վճարել Ադրբեջանը Եվրոպայի հետ համաձայնության համար: Եվրամիությունը պնդե՞լ է, որ Ղարաբաղում հետաքննության մեխանիզմներ տեղադրվեն կամ այլ կերպ ասած ներկայիս իրավիճակի պահպանվի: Չէ՞ որ առանց կայունության գազային նախագծերը չեն կարող իրագործվել: Ոչ ոք ներդրումներ չի անի տարածաշրջանում, եթե չկան կայունության երաշխիքներ:
Ալիեւի հետ զրույցում ԵՄ նախագահ Դոնալդ Տուսկը հայտարարել է «ստատուս-քվոյի անկայունության» մասին: Չնայած Ալիեւը հայտարարության էր սպասում ստատուս-քվոյի անթույլատրելիության մասին, սակայն, ըստ ամենայնի, ստիպված է եղել համաձայնվել Տուսկի հետ:
Կարելի է ենթադրել, որ Եվրոպային այս պահին ձեռնտու է տարածաշրջանային ստատուս-քվոն եւ մտադիր է աջակցել ստատուս-քվոն «կայունացնող» միջոցառումներին: Հնարավոր է զսպման մեխանիզմներ ներդրվեն, միգուցե նաեւ «չհարձակման» համաձայնագիր ստորագրվի: Չի բացառվում, որ հենց դա էր Ալիեւի գազային նախագծին Եվրոպայի համաձայնության գինը:
Հատկանշական է, որ օրերս Երեւանում էին եվրոպացի կարեւոր պաշտոնյաներ, որոնք իրենց այցի գլխավոր ձեռքբերումներից մեկն են համարում Բրյուսել այցելելու Սերժ Սարգսյանի համաձայնությունը: Այս այցը դիտարկվում է Հայաստան-ԵՄ նոր շրջանակային համաձայնագրի շուրջ աշխատանքների ավարտի շրջանակում: Չի բացառվում, սակայն, որ կքննարկվի ստատուս-քվոյի «կայունության» հարցը, ինչպես նաեւ այն, թե Հայաստանն ինչ կարող է անել դրա համար:
Եվրոպան կփորձի՞ իր վրա վերցնել ղարաբաղյան հարցով գլխավոր բանակցողի եւ Հարավային Կովկասում գլխավոր «երաշխավորի» դերը: Ինչի՞ համար են Սերժ Սարգսյանին Բրյուսել կանչում եւ ինչու՞ Սարգսյանը երկար ժամանակ համաձայնություն չէր տալիս: