Արցախում ոչ մեկ չի պատրաստվում դժվարությունների առաջ ընկրկել. Ռուբեն Վարդանյան

Արցախում ոչ մեկ չի պատրաստվում դժվարությունների առաջ ընկրկել. պետնախարար Ռուբեն Վարդանյանն է այդ մասին ասել ընդլայնված կազմով խորհրդակցությանը։ Պետնախարարն ընդգծել է, որ չնայած առկա բարդ մարտահրավերներին, չպետք է խուճապի մատնվել և պետք է շարունակել աշխատել համակարգված և պատասխանատու կերպով ՝ յուրաքանչյուրն իր տեղում կատարելով իր գործը:

Նա նշել է, որ արցախցիներն արժանապատվորեն են տանում դժվարությունները՝ ցուցաբերելով տոկունություն և ողջախոհություն՝ առանց խուճապային տրամադրությունների տրվելու: Արցախի պետնախարարի և նրա թիմի աշխատանքը, փաստենք, բավական արդյունավետ է և լավ կազմակերպված։

Հատկապես արագ և օպերատիվ են իրականացվում որոշումների ընդունումը։ Ադրբեջանի կողմից գազի մատակարարման խափանումներից կարճ ժամանակ անց պետնախարարը հանձնարարել է դադարեցնել դասերը դպրոցներում, որտեղ ջեռուցման հնարավորություն չկա։

«Այս ծայրահեղ իրադրության մեջ ամենակարևորը մեր զգոնությունն է, կարգապահությունը, կազմակերպվածությունը․ մենք խուճապային տրամադրությունների մեջ հայտնվելու իրավունք չունենք: Երբեք չհավատաք ապատեղեկատվությանը, որը թշնամին տարածում է՝ արցախցիների դիմադրության ոգին կոտրելու համար։ Երբեք չտրվեք բամբասանքներին և խուճապային տրամադրություններին»,- նշել է պետնախարարը, հավելել, թե անում են ամեն ինչ՝ բացառելու հումանիտար ճգնաժամը։

Ռուբեն վարդանյանը նաև կոչով դիմել է միջազգային գործընկերներին. «մենք ձեր հստակ աջակցության կարիքն ունենք՝ հումանիտար աղետը կանխելու համար: Ադրբեջանի այս գործողությունները ոչ միայն նոյեմբերի 9-ի եռակողմ հայտարարության կոպիտ խախտում են, այլև ուղղակի ահաբեկչություն են Արցախի խաղաղ հայ բնակչության նկատմամբ: Միջազգային հանրությունը պետք է վճռորոշ կերպով դատապարտի Ադրբեջանի կողմից բոլոր միջազգային պարտավորությունների խախտումը»։

Ըստ պետնախարարի, Լաչինի միջանցքում այս սադրանքի նպատակներից մեկը ռուս խաղաղապահների հեղինակազրկումն է։ «Ադրբեջանն ամեն ինչ անում է վաղաժամ դադարեցնելու համար ռուսական խաղաղապահ ուժերի մանդատը, որը կոչված է ապահովել Արցախի ժողովրդի անվտանգությունը։ Անհրաժեշտ եմ համարում խաղաղապահ զորակազմի ընդլայնումը և մանդատի երկարաձգումը։ Բայց, իհարկե, առաջին հերթին, մենք պետք է հույսներս դնենք միայն մեզ վրա։ Ադրբեջանի նպատակը մեզ ճնշելը, թուլացնելն ու հուսալքելն է: Նրանք պետք է հասկանան՝ հնարավոր չէ կոտրել մեր ոգին, քանի որ սա մեր պետությունն է, մեր հայրենիքը, մենք այստեղից չենք հեռանալու։ Վստահ եմ ՝ այս փորձությունները մեզ ավելի ուժեղ են դարձնելու։ Միավորվելով վտանգի դեմ՝ մենք կկարողանանք պաշտպանել Արցախի՝ ազատության և ինքնորոշման իրավունքը»,- նշել է Վարդանյանը:

Ազատ Կարապետյան