Ռուբեն Վարդանյանն աշխատում է բոլոր ուղղություններով՝ ուշադրություն չդարձնելով ֆեյքային հարձակումներին

Արցախի պետնախարար Ռուբեն Վարդանյանը երեկ հանդիպում է ունեցել արցախցի այն ծնողների հետ, որոնց երեխաներն Ադրբեջանի կողմից Արցախի շրջափակման հետևանքով ստիպված են մնալ Հայաստանում։ «Որպես հայր ես հասկանում եմ ձեր ապրումները, ձեր մտահոգություններն ու անհանգստությունները, մյուս կողմից ուզում եմ հավաստիացնել, որ ամեն ինչ անելու ենք, որպեսզի երեխաներն այնտեղ ապահովված լինեն ու նորմալ կենսապայմաններ ունենան»,- նշել է Վարդանյանը։

Հիմնականում Հայաստանում են գտնվում մշակութային և մարզական միջոցառումներին մասնակցելու ժամանած երեխաներ, բայց կան նաև տարբեր դեպքեր, երբ ծնողներն են մնացել Հայաստանում, իսկ մանկահասակ երեխաները՝ Արցախում։ Ուստի և, պետնախարարն ու իր թիմն ամեն ինչ անում են թե՛ երեխաների համար նորմալ ապրելու պայմաններ ստեղծելու, թե՛ ծնողներին հոգեբանորեն օգնելու համար։

Ռուբեն Վարդանյանը լսել է ծնողներին, նրանց առաջարկները, մտահոգությունները, և, ըստ էության, ծնողներին հիմնականում հետաքրքրել է երեխաների ուսմանը, կեցության կազմակերպմանը վերաբերող հարցեր։ Ծնողները նաև շնորհակալություն են հայտնել այն կազմակերպություններին և անհատներին, ովքեր իրենց աջակցությունն են ցուցաբերում Հայաստանում մնացած երեխաներին։

Ըստ էության պետնախարարի այս քայլը վկայում է, որ նա տիրապետում է խնդիրների ամբողջ փաթեթին, հստակ գիտակցում, որ նույնիսկ մի քանի տասնյակ երեխաների իրենց ծնողներից բաժանված լինելը հոգեբանական լուրջ ազդեցություն է գործում արցախցիների վրա։ Ի վերջո նա ինքն էլ երեկ առավոտյան հայտարարել էր, որ շատերի մոտ կարող է դեպրեսիա սկսել, իրավիճակը չափազանց լարված է մնում, ուստի և նախարարի թիմն աշխատում է բոլոր ճակատներով, փորձում թե՛ բացել Լաչինի միջանցքը, թե՛ պայքարում է ապատեղեկատվության և Ռուբեն Վարդանյանի դեմ տարվող կեղտոտ քարոզչական արշավի դեմ, թե՛ փորձում է հանգստացնել արցախցիներին, թե՛ սնունդ և վառելիք հայթայթել նրանց կյանքն ապահովելու համար։

Միևնույն ժամանակ պետնախարարը նաև ակտիվորեն շփվում է միջազգային լրատվամիջոցների հետ, ներկայացնում իրավիճակն Արցախում։ Երեկ էլ նա հարցազրույց է տվել ամերիկյան CBN պարբերականին, խոսել Արցախի հայկական արմատների անկախության համար շարունակվող պայքարի մասին, հայտարարել, թե սա կրոնական կոնֆլիկտ չէ Ադրբեջանի և Լեռնային Ղարաբաղի միջև:

«Սա պայքար է ավտորիտար երկրի և դեմոկրատական պետության միջև, մենք բոլորս գիտենք, որ Ադրբեջանում չկա ժողովրդավարական համակարգ, չկան մարդու իրավունքներ»,- նշել է պետնախարարը։

Ուստի և այս ջանքերից իրավիճակը հստակ պատկերացնելուց և համարժեք քայլեր ձեռնարկելուց հետո, առնվազն տարօրինակ և նողկալի են բոլոր այն հարձակումները, որ իրականացվում են պետնախարար Ռուբեն Վարդանյանի դեմ։

Լինա Արամյան