Բարդ հարցազրույց և պարզ պատասխաններ. Ռուբեն Վարդանյանը նեղն է գցել BBC-ի ամենակոշտ հաղորդավարին

Արցախի պետնախարար Ռուբեն Վարդանյանը օրերս հարցազրույց է տվել BBC բրիտանական հեռուստաալիքի «Hard talk» հաղորդաշարի վարող Ստեֆեն Սակուռին։

Սակուռը հայտնի է նրանով, որ բավականին բարդ և լուրջ, ծանր հարցեր է տալիս իր հյուրերին՝ գրեթե չխնայելով նրանց։ Հարցազրույցն ամբողջությամբ անցել է ադրբեջանական նարատիվների, ադրբեջանական թեզերի կրկնությամբ։ Բրիտանացի հաղորդավարը փորձել է հունից հանել Ռուբեն Վարդանյանին, սակայն՝ ապարդյուն։

Վերջինս բավականին պատրաստված և հրաշալի հարցազրույց է տվել, մասնավորապես հայտարարել է, թե Արցախը լիովին անկախ պետություն է և ադրբեջանցիները ստիպված պետք է լինեն ի վերջո ընդունելու այդ փաստը և ապրելու կողք կողքի։ Սակուռը նույնիսկ հարցրել է օֆշորային սկանդալի վերաբերյալ, ինչին ևս բավական հանգամանալից և հստակ պատասխան է հետևել։

Ամենակարևոր հարցը, որ տրվել է Ռուբեն Վարդանյանին՝ «Թե ինչո՞ւ Լեռնային Ղարաբաղի բնակիչները չպետք է ապրեն Ադրբեջանի կազմում»։ Ռուբեն Վարդանյանը մանրամասն ներկայացրել է, որ Ադրբեջանը ավտորիտար բռնապետական պետություն է, հայտարարել, թե Ադրբեջանի գոյության 104 տարուց 44 տարին մեկ ընտանիք է ղեկավարում այդ երկիրը, նախ Խորհրդային միության կազմում, իսկ հետո՝ որպես անկախ հանրապետություն, նշել, որ ադրբեջանցին որևէ իրավունք չունի, իսկ հայերի մասին խոսելն արդեն իսկ ավելորդ է։ «Ինչպե՞ս եք պատկերացնում ազգային փոքրամասության համար, ինչպես նրանք են վերաբերվում մեզ, ցանկացած իրավունք ստանալու, ցանկացած պաշտպանություն ստանալու հնարավորությունը։ Մեզ համար սա ուզել-չուզելու հարց չէ, մենք ոչ մի հնարավորություն չենք տեսնում», - ընդգծել է Ռուբեն Վարդանյանը։

Սադրանքը, որ նախապատրաստել էր BBC-ն, այդպես էլ չի անցել, փոխարենը Սակուռն ու իր գործընկերները փորձել են երեկ «վրեժխնդիր» լինել Ռուբեն Վարդանյանից և նրա անգլերեն լեզվով տված հարցազրույցը BBC-ն իր յութուբյան ալիքում դրել է ադրբեջանական ամբողջական թարգմանությամբ՝ Ռուբեն Վարդանյանին էլ ներկայացնելով որպես «վիճելի Լեռանային Ղարաբաղի պետնախարար», ինչը թերևս վկայում է, որ բրիտանական հեռուստաընկերությունը հստակ ուղորդված է եղել Ադրբեջանի կողմից, բայց չկարողանալով գնալ սադրանքների, ի վերջո փորձել է էժան քայլով շահել ալիևյան վարչախմբի սիրտը և ստացած գումարներն արդարացնել անհեթեթ և անիմաստ սադրանքով։ 

Մանասե Գևորգյան