Ըստ Ռուբեն Վարդանյանի, մենք ունենք մեկ ճանապարհ

«Եթե մենք ուզում ենք, որ Ադրբեջանն Արցախը հայաթափելու իր ծրագրերում չհաջողի, մենք ունենք մեկ ճանապարհ՝ սեղմել ատամներն ու առաջ գնալ»,- Արցախի պետնախարար Ռուբեն Վարդանյանն այդ մասին ասել է Ստեփանակերտի բնակչության հետ հանդիպմանը։

Օրեր շարունակ պետնախարարն ու իր թիմի անդամները հանդիպել են Արցախի տարբեր բնակավայրերի բնակիչներին, իսկ ամենավերջում նաև Ստեփանակերտի բնակչությանը, ներկայացրել մարտահրավերներն ու խնդիրները, որոնց պետությունն ու հասարակությունն առերեսվում են ադրբեջանական շրջափակման պատճառով։

Պետնախարարը ներկայացրել է օպերատիվ շտաբի կողմից ճգնաժամային իրավիճակում բնակչության կենսագործունեության ապահովման, հրատապ խնդիրների լուծման, ճգնաժամի հետևանքների մեղման ուղղությամբ կատարվող աշխատանքները։ Նա կարևոր է համաարել այս բարդ ժամանակաշրջանում ժողովրդի հետ հետադարձ կապի պահպանումը, ամբողջական տեղեկատվության փոխանցումը։

Նշելով, որ կա մեկ ճանապարհ՝ սեղմել ատամներն ու առաջ գնալ՝ Ռուբեն Վարդանյանն ասել է. «Ու դա կարող ենք անել միայն համախմբվելու միջոցով»։

Ինչպես և սպասելի էր, Ստեփանակերտի հանդիպումների մասնակիցները վստահեցրել են, որ ոչ մի շրջափակում չի կարող կոտրել հայրենի հողում իրենց արժանապատիվ կյանքը շարունակելու հաստատակամությունը։

Պետնախարարի աշխատանքը բավականին լուրջ ռեզոնանս է առաջացրել Արցախում և հնարավորություն է տվել, որպեսզի արցախցիները հասկանան, որ իրենց թիկունքում կանգնած է իշխանություն, որը փորձում է հնարավորության դեպքում կանխել բոլոր բացասական երևույթները և հավասար աչքով նայել Արցախի բոլոր բնակիչներին։

Սոցիալական արդարությանը միտված այս քայլերը հենց այն են, ինչ առաջնահերթ անհրաժեշտ են ծանր ճգնաժամային իրավիճակում հայտնված արցախցիների համար։ Միայն այս եղանակով է հնարավոր բարձրացնել արցախցիների ոգին և ձախողել թշնամու բոլոր ծրագրերը։ 

Սերինե Բադալյան