Արցախի պետնախարար Ռուբեն Վարդանյանի դեմ խմորումները շարունակվում են

Արցախի պետնախարար Ռուբեն Վարդանյանի դեմ խմորումները շարունակվում են։

Մեր աղբյուրի փոխանցմամբ՝ Նիկոլ Փաշինյանի ազդեցության տակ գտնվող նախագահ Արայիկ Հարությունյանը, ինչպես նաև արցախյան մի շարք քաղաքական ուժեր և ազդեցիկ դեմքեր, այժմ էլ փորձում են ամեն ինչ անել Ռուբեն Վարդանյանից ամեն գնով ձերբազատվելու նպատակով։

Հայկական մամուլում Վարդանյանի դեմ առայժմ թույլ դոզաներով, սակայն բավական զգալի և ուշագրավ արտահոսքեր են կազմակերպվում, ցույց տալու համար, թե Վարդանյանը իբր չունի համապատասխան լծակներ և ազդեցություն Արցախում, իսկ Ադրբեջանն ու Հայաստանի գործող վարչախումբը շահագրգռված է նրանից հրաժարվելու վերաբերյալ։

Ի դեպ, տարածվող նարատիվներից մեկն իբր այն է, թե Ռուբեն Վարդանյանին առանձնապես չեն հավանում նաև ռուսական շրջանակներում, և իբր Ռուսաստանի նախագահ Վլադիմիր Պուտինն անձամբ է Նիկոլ Փաշինյանին ասել, թե Ռուբեն Վարդանյանին Մոսկվայից չեն գործուղել Ստեփանակերտ։

Իհարկե, Ռուբեն Վարդանյանն ինքն էլ նշել է, որ առանձնապես կապեր չունի ռուսական քաղաքական ղեկավարության հետ, սակայն ակտիվորեն շփվում է Ռուսաստանի իր ընկերների և գործընկերների հետ։ Խնդիրն այն է, որ Ադրբեջանը ավելի է ուժգնացնում հակաարցախյան իր քարոզչությունը, ինչպես նաև փորձում է նոր սադրանքներ իրականացնել թե՛ Հայաստանի և թե՛ Ադրբեջանի դեմ։

Մարտակերտում նախօրեին տեղի ունեցած հրադադարի ռեժիմի խախատումը և այդ մասին ռուսական խաղաղապահ զորախմբի հայտարարությունը վկայում են, որ Ադրբեջանը փորձում է լայն ճնշումների անցնել Արցախում։ Առաջին և հիմնական խնդիրը, որից ադրբեջանական իշխանությունները նյարդայնանում են՝ հենց պետնախարար Ռուբեն Վարդանյանի նշանակումն է։

Պետնախարարին հաջողվել է լրջորեն խափանել Ադրբեջանի և փաշինյանական իշխանության համատեղ բազմաթիվ ծրագրեր Արցախի վերաբերյալ և հենց դա է Արցախի շրջափակման հիմնական պատճառներից մեկը։

Այժմ էլ Փաշինյանն ու Ալիևը ձեռք ձեռքի տված ամեն կերպ փորձում են ազատվել Ռուբեն Վարդանյանի ներկայությունից Արցախում՝ իրենց հետագա դավադրությունները անխափան իրականացնելու նպատակով։

Սերինե Բադալյան