Արտակարգ դեպք Երևանում

Երևանի Նուբարաշեն թաղամասում 50-ամյա տղամարդը վիճաբանության ժամանակ դանակահարել է 61-ամյա ընկերոջը։ Տեղեկությունը հայտնում է ՀՀ ոստիկանության մամուլի ծառայությունը։

Դեպքը տեղի է ունեցել փետրվարի 28-ին, սակայն դանակահարողը հայտնաբերվել է մարտի 5-ին։

«Ոստիկանությունը հաղորդում էր ստացել շտապօգնությունից, որ փետրվարի 28-ին օգնություն են ցուցաբերել 61-ամյա տղամարդուն, սակայն թիկունքին կտրած-ծակած վերքեր ստացած տղամարդը հրաժարվել է հոսպիտալացումից: Ոստիկանության ծառայողները պարզել էին, որ ահազանգից 1 ժամ առաջ տեղի ունեցած վիճաբանության ժամանակ տղամարդու թիկունքին դանակի 3 հարված էր հասցրել նրա 50-ամյա ընկերը, ինչից հետո դանակահարված տղամարդը բահով խփել էր նրա գլխին»,– ասված է հաղորդագրությունում։

Նշվում է, որ ի վերջո, դանակահարվածը տեղափոխվել էր «Էրեբունի» բժշկական կենտրոն:

Դեպքի առթիվ նախաձեռնվել էր քրեական վարույթ:

Ոստիկանության ծառայողների ձեռնարկած միջոցառումների շնորհիվ դանակահարողը հայտնաբերվել է մարտի 5-ին, ձերբակալվել և տեղափոխվել է բաժանմունք: Անձնական խուզարկությամբ նրա մոտ հայտնաբերվել է հանցագործության գործիք դանակը:

Նախաքննական մարմինը պարզում է դեպքի հանգամանքները։