Ռուբեն Վարդանյանի կադրերին հեռացնում են պաշտոններից

Շրջափակված Արցախում շարունակվում է նախկին պետնախարար Ռուբեն Վարդանյանի դեմ արշավը։ Արցախի նախագահ Արայիկ Հարությունյանը երեկ միանգամից երեք նախարարների ազատել է պաշտոնից. Հրանտ Սաֆարյանն ազատվել է գյուղատնտեսության, Արմեն Մանգասարյանը՝ սոցիալական զարգացման և միգրացիայի նախարարի պաշտոններից, իսկ Արամ Սարգսյանը` քաղաքաշինության նախարարի պաշտոնից։

Նրանք ընդամենը 2 ամիս էին պաշտոնավարում և նախարար էին նշանակվել նախկին պետնախարար Ռուբեն Վարդանյանի առաջարկով։ Նոյեմբերի վերջին նախարարի պաշտոնից ազատվել էին Ռուբեն Վարդանյանի վերահսկողության տակ գտնվող ոլորտների բոլոր պատասխանատուները՝ 11 նախարարությունից 9-ի ղեկավարները։ Պետնախարարը իր թիմից բավական կարող և հմուտ կադրերի էր տարել Արցախ և պաշտոնի նշանակել, որոնց աշխատանքի արդյունքները շատ կարճ ժամանակահատվածում երևացին, նույնիսկ շրջափակման պայմաններում, իսկ այժմ նախկին պետնախարարից ազատվելուց հետո , Արայիկ Հարությունյանն ու նոր պետնախարար Գուրգեն Ներսիսյանը սկսել են Վարդանյանի բոլոր կադրերին հեռացնելու գործընթացը։

Առայժմ հեռացվել են միայն երեքը, սակայն մյուս 6 նախարարները, գրեթե կարող են վստահ լինել, որ իրենք էլ շատ կարճ ապագայում հեռացվելու են։ Ընդհանրապես նոր պետնախարար Գուրգեն Ներսիսյանի տրամադրության տակ կլինեն ոչ թե 9, այլ 8 նախարարներ, արտաքին գործերի նախարարությունը կրկին անցելու է Արայիկ Հարությունյանի վերահսկողության ներքո, ուժայիններն ու արտաքին հարաբերությունները Արայիկ Հարությունյանը որևէ մեկին չի ցանկանում փոխանցել։

Դեռևս օրեր առաջ՝ պետնախարարի պաշտոնից ազատվելուց հետո, մեր լրատվամիջոցը նշել էր, այսպիսի հեռանկարի մասին, որ Արցախում չափազանց ծանր են տանում Ռուբեն Վարդանյանի կադրերի նշանակումը, և նախկին պաշտոնյաները կրկին ցանկանում են վերադառնալ պաշտոնի։

Եվ Վարդանյանին հաջողվել էր շատերին զրկել պետական բյուջեում վատնելու հնարավորությունից, կանխել բազմաթիվ բացասական երևույթներ։ Այժմ, այլևս, գլխավոր խոչընդոտին հեռացնելուց հետո, նրա կադրերին հեռացնելը ընդամենը տեխնիկայի հարց է ։

Մինաս Ավագյան