Ադրբեջանում պաշտոնանկ է արվել ամենակարող նախարարը. Ինչից է վախեցել Ալիեւը

«ԼՐԱԳԻՐ»

Երեկ Ադրբեջանում պաշտոնից հեռացվել է տրանսպորտի նախարար Զիա Մամեդովը: Ավելի ճիշտ, տրանսպորտի նախարարությունը միացվել է այլ գերատեսչության, իսկ Մամեդովն անսպասելի հեռացվել է:
Խոսքը սովորական նախարարի մասին չէ: Ադրբեջանում Զիա Մամեդովին համարում են մարդ, որը կարող է կարգավիճակով մրցել անգամ Ալիեւի հետ: Նա հարեւան երկրի ամենահարուստ մարդկանցից մեկն է: Տեղեկություններ կան, որ 2013 թվականին նա Կասպից ծովով Ռուսաստան է ուղարկել փողով բեռնված 17 տոննայանոց նավ: Ասում են, որ այնտեղ նվազագույնը 1.5 միլիարդ դոլար է եղել:
Հայտնի չէ, թե արդյոք նա կարողացել է փողը դուրս բերել, թե դրանք բաժին են հասել ռուս սահմանապահներին, սակայն Ադրբեջանում Մամեդովի հեռացումը երկյուղով են ընդունել: Ադրբեջանում սովորաբար աշխատանքից ազատում են նրանց, որոնց կասկածում են իշխանության տապալման փորձերի ու դավադրութան մեջ: Այդպես էր ազգային անվտանգության նախկին նախարար Մահմուդովի դեպքը, եւ երբ անգամ Նարդարանում անկարգություններ եղան, կրկին շշուկներ էին հայտնվել, որ իրանամետ իսլամիստները հեղաշրջում են ծրագրել:
Զիա Մամեդովի հեռացումը կկապե՞ն հերթական դավադրության հետ, թե՞ խնդիրն ընդամենը փողն է: Ալիեւը վերջին 1-2 տարում, տնտեսական վիճակի վատթարացմանը զուգահեռ, մեծահարուստների իսկական որս է սկսել՝ կուլակաթափ անելով նրանց եւ ստիպելով վերադարձնել կապիտալը, որը թանկ նավթի ժամանակ թույլ էր տվել կուտակել:
Կարող է այլ պատճառ էլ լինել: Լինելով տրանսպորտի ամենակարող նախարար՝ Մամեդովն այդպես էլ չի կարողացել երկու առանցքային խնդիր լուծել՝ Կարս-Թբիլիսի-Բաքու երկաթուղու գործարկումը եւ Ռեշտ-Աստարա իրանա-ադրբեջանական երկաթուղու շինարարությունն ավարտելը:
Ադրբեջանը, իհարկե, գործի իր մասն արել է, անգամ Իրանին ու Վրաստանի վարկ է տվել ճանապարհների կառուցումն ավարտին հասցնելու համար, սակայն դրանք այդպես էլ չեն բացվել: Մամեդովի հեռացումից ընդամենը մեկ օր առաջ հայտնի դարձավ, որ Կարս-Թբիլիսի-Բաքուն կգործարկվի ոչ թե մարտին, ինչպես խոստացել էին, այլ տարվա երկրորդ կեսին: Իբր, ամեն ինչ չէ, որ պատրաստ է:
Զիա Մամեդովը չի մեկնաբանել իր հեռացումը, հավանաբար գոհ մնալով, որ ազատության մեջ է: Ակնհայտ է, սակայն, որ Ալիեւն սկսել է սեփական ստվերից վախենալ: Առավել եւս, որ արեւմտյան մամուլում սկսել են գրել, որ Ալիեւին իշխանությունից հեռացնելու քաղաքական որոշում է կայացվել: