Արցախում այսօր անընդունելի իրավիճակ է. Ռուբեն Վարդանյանը՝ Արցախում տիրող իրավիճակի մասին

Արցախում այսօր անընդունելի իրավիճակ է։

Նախկին պետնախարար Ռուբեն Վարդանյանը «Շրջափակման պատճառով Լեռնային Ղարաբաղի տնտեսության կորուստների գնահատման մասին» զեկույցի ներկայացման ժամանակ նշել է, թե ասելու է շատ ցավալի բաներ, բայց կարևոր է, որ ազնիվ լինեն մեր հասարակության հետ։

Ըստ Վարդանյանի, մի քանի հոգի հնարավորություն ունեն, պայմանավորվելով ռուս խաղաղապահների հետ, ապրանք բերել Արցախ, իսկ գնաճը կապված է ոչ թե ընդհանուր գների բարձրացման հետ, այլև ունեն մեքենաների քանակի սահմանափակում։

Ըստ Վարդանյանի, եթե դեկտեմբերին շրջափակված Արցախ օրական 3 մեքենա էր գալիս, հիմա հասել է 16-ի, քանի որ ռուս խաղաղապահները կարողանում են բերել ու ապահովել ինչ-որ քանակի ուտելիք։

Արդյունքում, սակայն, մի քանի մարդ աշխատում են մեծ գումարներ։ «Հիմա մենք ունենք իրավիճակ, երբ մարդիկ Արցախ են բերում ձմերուկ, անանաս, ուզում եմ ասել՝ ամոթ այդ մարդկանց, դա ինձ համար անընդունելի է, որ մարդիկ իրենց փող աշխատելու համար պամելո, անանաս կամ ուրիշ բաներ են բերում, ոչ թե մարդկանց անհրաժեշտ ընդհանուր սնունդ, որը պետք է բոլորը հավասար ստանան»,- ասել է Ռուբեն Վարդանյանը։

Նա միաժամանակ նշեց, որ այսօր Արցախում սննդի կտրոնները չեն աշխատում ու մարդիկ չեն կարողանում դրանցով ապրանք գնել, քանի որ բերվում է ապրանք, որը վաճառվում է ավելի թանկ գնով։

Նախկին պետնախարարն անդրադարձել է կտրոնների ժամկետին, որն այժմ երկարացրել են։ Ստեղծվել է մի իրավիճակ, երբ մարդ իր կտրոնն օգտագործել է և չի կարողանում նոր կտրոն ստանալ։ «Հիմա ստեղծվել է անհասկանալի իրավիճակ: Դրա համար, ցավոք, գնաճն այս իրավիճակում վերջին կետն է: Դրա համար պետք է սկզբից հստակ լինի՝ ո՞վ է առնում այդ ապրանքը, ի՞նչ գներով է առնում, ով է այդ տենդերը կազմակերպվում, քանի որ շատ փոքր քանակի մեքենաներ կարող են գնալ-գալ Արցախ և պետք է տեսնել, թե ում ձեռքին է սնունդն ապահովելու գործընթացը»,- ընդգծել է Ռուբեն Վարդանյանը։

Նրա խոսքով՝ թափանցիկ մեխանիզմներ պետք է ստեղծվեին, աշխատանք շատ կար անելու, այնպես չէր, որ իրենց ժամանակ էլ ամեն ինչ իդեալական էր, բայց այսօր հետ են ընկել։ «Ով լավ կապեր ունի պետական բարձր պաշտոնյաների հետ, փող են աշխատում օգտագործելով այս իրավիճակը։ Դա ես համարում եմ անընդունելի։ Արցախում ունենք իրավիճակ, երբ շրջափակման մեջ, երբ մենք պետք է լինենք մի բռունցք, բայց կրկին թիրախավորվել է արդարության, իրար նկատմամբ հավատի հասկացողությունը, և դա ավելի շատ վնաս է հասցնում, քան փողային կամ տնտեսական վնասները»,- ընդգծել է Ռուբեն Վարդանյանը:

Աննա Նադոյան