Ադրբեջանն ակտիվորեն շարունակում է իր հսկողության տակ անցած տարածքների «յուրացումը»

Ադրբեջանական մամուլում հայտնված հրապարակումներից դատելով, այդ երկրի իշխանությունները ակտիվորեն շարունակում են 44-օրյա պատերազմի արդյունքում իրենց վերահսկողության ներքո հայտնված տարածքների «յուրացումը»։ Այս անգամ ուշադրություն է գրավել վերոնշյալ տարածքներում ադրբեջանական իշխանությունների կողմից նախաձեռնվող «դպրոցաշինության ծրագիրը»։ Ըստ այդմ, Զանգիլանում առաջիկայում կկառուցվի 960 աշակերտի համար նախատեսված միջնակարգ դպրոց։ Այս պահին պատրաստ  են նախագծանախահաշվային փաստաթղթերը։

Շինաշխատանքները կսկսվեն այս տարվա սեպտեմբեր-հոկտեմբեր ամիսներին։ Ջաբրայիլում արդեն իսկ մեկնարկել է միջնակարգ դպրոցի շինարարությունը, որը վերստին 960 աշակերտի համար է նախատեսված լինելու։ Ուշագրավ է այն, որ Բաքուն իրականացնելու է Շուշիի պատմական ռեալական գիմնազիայի վերականգնումը։ Այս պահին, ըստ ադրբեջանական մամուլում շրջանառվող տեղեկությունների, արդեն պատրաստ են վերջինիս նախագծանախահաշվային փաստաթղթերը։ Քելբաջարում եւս կկառուցվի 960 աշակերտի համար նախատեսված միջնակարգ դպրոց։ Շինաշխատանքներն այստեղ կմեկնարկեն այս տարվա սեպտեմբեր-հոկտեմբեր ամիսներից։

Նույն ժամանակվանից կմեկնարկի նաեւ Ֆիզուլիի մասնագիտական լիցեյի շինարարությունը։ Այս պահին ընթանում են Լաչինի թիվ 2 միջնակարգ դպրոցի կապիտալ վերանորոգումը։ Աղդամում էլ կառուցվում է 960 աշակերտի համար նախատեսված միջնակարգ դպրոց, որի շինաշխատանքները կավարտվեն ընթացիկ տարվա սեպտեմբերի 15-ին։ Շուշիում այս պահին ընթանում է թիվ 1 դպրոցի շինարարությունը /մեկնարկել է 21 թվականի մայիսին/, որը կավարտվի այս տարվա սեպտեմբերի 15-ին։ Դատելով այս տեղեկություններից, կարելի է եզրակացնել, որ առաջիկայում Ադրբեջանը նախատեսում է բավականին լուրջ ծավալով վերաբնակեցումներ իրականացնել 44-օրյա պատերազմի հետեւանքով իր հսկողության ներքո տանցած տարածքներում։