Նախազգուշացում պաշտոնական Բաքվին

1in.am. ԵԱՀԿ Մինսկի խմբի ամերիկացի նախկին համանախագահ Ջեյմս Ուորլիքը «Ամերիկայի ձայնին» տված հարցազրույցում մի քանի ուշագրավ հայտարարություն է արել Արցախյան հակամարտության կարգավորման գործընթացի վերաբերյալ: Օրինակ՝ Ուորլիքը հայտարարել է, որ երբ ինքը հեռացավ, սեղանին կային բավականին ուշագրավ առաջարկներ: Թե, մասնավորապես, ինչ առաջարկների մասին է խոսքը՝ Ուորլիքը չի նշում: Միևնույն ժամանակ Ուորլիքը նաև հայտարարում է, որ դեռևս մինչև վերջ պարզ չէ այն, ինչ տեղի է ունեցել ապրիլյան պատերազմի օրերին, և պարզ չէ, թե իրականում որքան են եղել զոհերը: Այս հանգամանքը անկասկած վերաբերում է Ադրբեջանին, քանի որ զոհերի և վիրավորների մասին տեղեկատվությունն, այսպես ասած, գաղտնիացված է հենց Ադրբեջանում, և Հայաստանի պարագայում նման խնդիրներ և կասկածներ հասարակությունը չունի:

Այս առումով Ուորլիքի հայտարարությունը նաև ուշագրավ է հնչում փետրվարի 25-ին տեղի ունեցած միջադեպի ֆոնին, և Մինսկի խմբի ամերիկացի նախկին համանախագահը, ըստ էության, արձանագրում է, որ Ադրբեջանի կորուստները լինում են շատ ավելի, քան արձանագրում կամ խոստովանում է Բաքուն:

Այստեղ, իհարկե, բուն խնդիրը ամենևին էլ ադրբեջանական կորուստների վիճակագրությունը չէ, այլ ազդակները, որ ստացվում են միջազգային հարթակներից: Իսկ Ուորլիքը հենց այդ հարթակը ներկայացնող գործիչ է: Այն, որ նա այլևս Մինսկի խմբի նախկին համանախագահ է, ըստ էության առնչվում է ընդամենը ֆորմալ կարգավիճակին, իսկ ոչ ֆորմալ իմաստով չի կարող լինել խիստ կարևոր աշխարհաքաղաքական հանգույց հանդիսացող գործընթացին առնչված նախկին դիվանագետ, և այդ գործով զբաղված մարդիկ անկասկած չափազանց պատասխանատու են անգամ պաշտոնաթող լինելուց հետո իրենց յուրաքանչյուր արտահայտության համար: Հատկապես երբ խոսքը վերաբերում է պաշտոնաթողությունից հետո կարճ ժամանակահատվածին:

Բացի այդ, Արցախյան կարգավորման գործընթացում կարծես թե առկա է նաև որոշակի «ավանդույթ», երբ պաշտոնը թողնող համանախագահները հանդես են գալիս այնպիսի ազդակներով, որոնք այս կամ այն պատճառով անպատեհ կլինեն պաշտոն զբաղեցնող համանախագահների շուրթերից հնչելու պարագայում: Այսինքն՝ կա ըստ էության ոչ միայն համանախագահության, այլ նաև նախկին համանախագահության չգրված մի ինստիտուտ, որի միջոցով հրապարակայնություն են ստանում ազդակներ, որոնք հնարավոր չէ պաշտոնական կարգավիճակում:

Եվ այս առումով հատկապես փետրվարի 25-ի միջադեպի ֆոնին Ուորլիքի հայտարարությունը ապրիլյան պատերազմի դեռևս չպարզված հանգամանքների և ավելի մեծ թվով զոհերի վերաբերյալ իր մեջ կարծես թե բավականին ուշագրավ ակնարկ է պարունակում Բաքվին՝ զգուշացման կամ նախազգուշացման համատեքստով: Ըստ այդմ, ամերիկացի նախկին համանախագահի խոսքում կարծես թե կա Ադրբեջանի իշխանությանը հասցեագրված բավականին բաց ակնարկ, որ կարող են հրապարակայնացվել ապրիլյան պատերազմի մասին տեղեկություններ, որոնք, մեղմ ասած, այդքան էլ հաճո չեն կարող լինել պաշտոնական Բաքվին և կարող են անհարմար վիճակ ստեղծել Ալիևի կամ արդեն տեր և տիկին Ալիևների համար: