Ինչպես են ադրբեջանցիները հայերեն սովորում (տեսանյութ)

Օրերս համացանցում տեսանյութ տարածվեց, որում երեւում է՝ ինչպես են ադրբեջանցի ուսանողները հայերեն սովորում: 2016 թվականի մայիսին արված տեսանյութում ուսանողները հայերենով ողջունում են դասախոսին, քննարկում օրվա դասի թեման եւ դաս պատասխանում: Armtimes.com-ի հետ զրույցում Razm.info մասնագիտական կայքի համակարգող Կարեն Վրթանեսյանը մանրամասներ ներկայացրեց տեսանյութի վերաբերյալ:

«Բաքվի պետական համալսարանն է, պատմության ֆակուլտետի կովկասագիտության ամբիոնը»,- ասաց նա՝ ավելացնելով, որ նրանց հայերենում գուցե որոշակի թերություններ կան, սակայն դրանք երկրորդական են, քանի որ ժամանակի ընթացքում կարող են վերացվել:

Հայաստանում էլ ադրբեջաներեն է դասավանդվում: Ինչպես նշում է Վրթանեսյանը, նման առարկա կա Երեւանի պետական համալսարանում, բացի այդ՝ 2016 թվականի մարտից ադրբեջաներենի դասընթացներ է կազմակերպում Ռազմինֆոն:

«Դասընթացներին մասնակցում են ուսանողներ, լրագրողներ, արեւելագետներ, կովկասագետներ, քաղաքագետներ։ Ընդհանրապես փորձում ենք համակարգված հիմքի վրա դնել ուսուցումը: Այդ աշխատանքի շրջանակներում նաեւ ստեղծվեց ու հրապարակվեց ռազմական եզրերի ադրբեջաներեն-հայերեն, հայերեն-ադրբեջաներեն համառոտ բառարան։ Ու արդեն աշխատում ենք նոր՝ ավելի ընդլայնված, հրատարակության վրա»,- ասաց Վրթանեսյանը:

Ապրիլից ադրբեջաներենով հետաքրքրվողների մի նոր խմբի հետ սկսվելու են դասընթացները: Խմբերում լինում են 10-12 հոգի: Ինչպես տեղեկացնում է Կարեն Վրթանեսյանը, ոչ բոլորն են ավարտում: Ներածական դասընթացը տեւում է 1,5–2 ամիս՝ կախված խմբից։ Հետո արդեն դասախոսներն անհատական աշխատում են ընտրված մարդկանց հետ։

^{Հ.Գ. այս տեսանյութի 2:28 րոպեից նույնպես կարող եք դիտել նույն դասախոսի՝ հայոց լեզվի դասը}