«Ապրիլին իրավիճակը կարող է ավելի սրվել»

Արցախա-ադրբեջանական հակամարտ զորքերի շփման գծում իրադրությունը գիշերը շարունակել է մնալ լարված: Այս օրերին մի ընդգծված տեսակետ կա, թե Ադրբեջանի կողմից սահմանային լարումն ուղղված է ներքին խնդիրները լուծելուն, ուղղված է ավելի շատ ներքին լսարանին:

«Ցանկանցած ընթացող պատերազմի ժամանակ չի կարող միայն մի գործոնով պայմանավորված լինել, այն էլ միայն ներքին, որովհետև պատերազմն առավելապես արտաքին ռազմաքաղաքական գործողություն է: Եթե Ադրբեջանը վստահ չլինի, որ չի պատժվի կամ առնվազն իրեն չեն հանդիմանի դրա համար, ինքը չի գնա սրացման: Ադրբեջանը վստահ է, որ չի լինի նման բան, դրա համար էլ գնում է սրացման»,- NewsBook-ի հետ զրույցում նման տեսակետ հայտնեց քաղաքագետ Արա Պապյանն՝ անդրադառնալով հարցին, թե իսկապես սահմանային լարվածության արտաքին որևէ գործոն չկա:

«Իմ կարծիքով, իհարկե, ներքին գործոններ ևս կան: Դա կապված է տնտեսական վիճակի վատթարացման հետ: Բացի այդ, հասարակության մեջ տիկին Ալիևայի նշանակումն այդքան միանշանակ չընդունվեց, արտառոց էր: Բայց Ադրբեջանի նման վարքն ավելի շատ արտաքին քաղաքական է. Ադրբեջանն ուզում է ցույց տալ, որ պատերազմն ընթանում է՝ հակամարտությունը սառած չէ և իր համար այդ ստատուս քվոյի պահպանումն անընդունելի է: Այսինքն, երբ Ադրբեջանը բողոքներ է ներկայացնում ԵՄ պատգամավորների դեմ, իբրև նրանց ինտերպոլը որոնում է, քրեական պատասխանատվության պետք է ենթարկվեն, լավ է հասկանում, որ դա չի լինի: Բայց նման որոշմամբ ինքն աշխարհին ցույց է տալիս, որ Ղարաբաղի վրա իր սուվերեն ձեռքն է: Հետևաբար ասում է, թե որևէ այլ տարբերակ, քան ադրբեջանական սուվերենիտետի տակ Ղարաբաղը դնելը, չի  ընդունում»,- ասաց քաղաքագետը:

Նրա խոսքով, ընդհանուր առմամբ, սրացման գնալը բազմագործոն երևույթ է:

«Օրինակ` ռուսական զենքի մատակարարումը և գնումները, նոր բանակցությունները Պակիստանից հարձակվողական զենք գնելու նպատակով, ռուս-թուրքական մերձեցումը: Կամ նույն ռուսների առաջարկը, թե ճիշտ է հետախուզական արբանյակ առնել Ռուսաստանից: Այս ամենը նշանակություն ունի, ինչպես նաև այնպիսի երևույթներ, որոնք համաշխարհային քաղաքական բնույթ չունեն, բայց խրախուսող են: Օրինակ՝ փետրվարի 25-ի դիվերսիոն հարձակման փորձի ձախողման, դիակների հանձնման վերաբերյալ ԵԱՀԿ-ի լղոզված ու անորոշ հայտարարությունը: Այդ անորոշությունը և ոչ հստակ դիրքորոշումը գործոններից մեկն է, որը խրախուսում է Ադրբեջանի ներկայիս վարքը»,- ասաց Արա Պապյանը՝ հավելելով, որ ներկայիս սահմանային լարվածության աճը կանխատեսելի էր:

«Անցած տարվա ընթացքում շատերն են ասել, որ եթե Ադրբեջանը չի պատժվում իր գործողությունների համար, ինքը փորձ է անելու կրկնել նույնը: Իսկ անցած տարվա գործողություններն Ադրբեջանն ընկալում է որպես հաղթանակ: Փետրվարի վերջն ընկած ժամանակահատվածում Խոջալուի օրերն էին, Սումգայիթն էր, գալիս են նաև անցած տարվա քառօրյա պատերազմի օրերը, մեր ընտրությունները, որոնք ևս Ադրբեջանին ինչ-որ ձևով խրախուսում են: Այս ամբողջը խորհրդանշանական ամսաթվեր են, որոնք քաղաքականության մեջ այդքան էլ անտեսված չեն: Բնականաբար, Ադրբեջանը գնում է սրման, և կարծում եմ, որ մարտի վերջ և ապրիլի սկիզբ ընկած ժամանակահատվածում վիճակը կարող է ավելի սրվել»,- նկատեց նա:

Հարցին` խորհրդարանական ընտրություններն ինչպե՞ս կարող են խրախուսական լինել ադրբեջանական կողմի համար, Արա Պապյանը նշեց. «Ընտրությունները, որոնցից ընտրողները բավարար չեն մնում, ամեն դեպքում բերում է վիճակի ապակայունացման: Իսկ այն, որ ընտրողները գոհ չեն մնում, դա արդեն ակնհայտ է: Քվեն ուղղակի կամ անուղղակի ձևով կեղծվելու է: Ուղղակին այն է, որ տեղում է շատ բան փոխվելու: Անուղղակին էլ այն է, որ այսօր արդեն սկսել են կաշառք բաժանել, մարդկանց վրա ճնշում գործադրել և այլն: Այսպես ասեմ՝ դժգոհության աստիճանը հասարակության ներսում շատանում է: Բնականաբար, հոգեբանական առումով հակառակորդի համար միշտ էլ հարմար է այդ ժամանակ գնալ պատերազմի, որովհետև ժողովուրդն ասում է՝ սրանց համար մենք պիտի կռվենք ու մեռնենք: Եթե երկրի ներսում լարվածությունը շատանա, դա էլ կլինի խրախուսիչ Ադրբեջանի համար»: