Երևանի քաղաքապետարանն անցել է կոշտ գործողությունների

Երևանի Աջափնյակ վարչական շրջանի Սիլիկյան թաղամասում երեկ միջադեպ է տեղի ունեցել բնակիչների և Երևանի քաղաքապետարանի աշխատակիցների միջև։ Քաղաքապետարանի մամուլի ծառայության փոխանցմամբ՝ Երևանի քաղաքապետի համապատասխան որոշումներով՝ Սիլիկյան թաղամասի 9-րդ փողոցի և գերեզմանին հարակից տարածքում քանդել են առանց հողօգտագործման իրավունքի և առանց համապատասխան թույլտվությունների՝ թվով 21 շինություններ։ «Բոլոր այդ շինություններն ապօրինի էին և կառուցվել էին վերջին ամիսների ընթացքում համայնքային սեփականություն հանդիսացող հողամասի վրա»,- հայտարարել էին Երևանի քաղաքապետարանից։

Իսկ երբ շինությունները փորձել են քանդել, բնակիչներից մեկն իր տրակտորով հարվածել է քանդումն իրականացնող տեխնիկային։ Ոստիկանությունը երկու հոգու ձերբակալել է։ Փաստի առնչությամբ՝ չափազանց ուշագրավ է Երևանի քաղաքապետարանի պահվածքը։ Իհարկե քաղաքապետարանը կարող էր այս դեպքում ևս տառապել պոպուլիզմով և ամբոխահաճո որոշումներով, ընդսմին ձեռք չտալ ապօրինի կառուցված շինություններին, սակայն այժմ փոխքաղաքապետ Տիգրան Ավինյանի գլխավորությամբ գործող քաղաքապետարանը տուրք չի տվել ապօրինություններին, ավելին, փորձել է շատ ավելի կոշտ և օրենքի շրջանակներում իրականացնել իր գործառույթները, միգուցե այս քայլից հետո, Ավինյանի և Երևանի քաղաքապետարանի վարկանիշը կարող է որոշ անձանց մոտ նվազել, սակայն փաստն այն է, որ առնվազն մեկ դեպքում գործ ունենք մի իրավիճակի հետ, երբ քաղաքապետարանն ասում և անում է իր հայտարարածը, այն էլ օրենքի շրջանակներում, ինչը հույս է տալիս, որ, գոնե բոլոր ոլորտների համատարած ձախողումների պարագայում, Երևանի քաղաքապետարանը կարողանում է կատարել իր իսկ տված խոստումները։ 

Աննա Նասիբյան