Սուրիկ Խաչատրյանի օրոք Գորիսը լքած գործարարը վերադարձել է ու վերականգնել իր բիզնեսը

Գորիսում երկար տարիներ գործարարությամբ զբաղվող, ԳԱՄՄԱ գործարանի տնօրեն Տիգրան Կարապետյանը, ով վերջին տարիներին Սյունիքի նախկին մարզպետ Սուրիկ Խաչատրյանի պատճառով դադարեցրել էր իր բիզնեսն ու հեռացել Հայաստանից, մարզպետի հրաժարականից հետո վերադարձել է հայրենի Գորիս ու վերականգնել իր գործունեությունը։ Ավելին, երկու նոր նախագիծ են մշակել և առաջիկայում զբաղվելու են դրանք կյանքի կոչելու գործով։

«Վարչապետ Կարեն Կարապետյանի գալուց հետո մեր աշխատանքները վերսկսվել են։ Այս պահին էլ մեր ընկերությունն աշխատում է, 70 աշխատող ունենք։ Բացի այդ, երկու նոր պրոյեկտ ունենք, որոնք մշակել ենք մի քանի ուղղություններով, այդ թվում և պաշտպանական՝ պաշտպանության նախարարության հետ ենք համագործակցելու արդյունաբերության ոլորտում, բայց այս մասով փակագծերը բացելու իրավունք չունեմ։ Ամեն դեպքում մենք մեր պրոյեկտները սկսել ենք, երկու ռուսական ընկերությունների հետ բանակցություններ ենք վարում նոր արտադրատեսակ բերելու համար, որից մեկը ռազմարդյունաբերությանն է վերաբերում, մյուսը՝ քաղաքացիական նշանակություն ունի»,- «Առաջին լրատվական»-ի հետ զրույցում ասաց գործարարը՝ հավելելով որ վարչապետի գալուց հետո բիզնես-մթնոլորտը էականորեն փոփոխվել է, և բոլոր պայմանները կան Հայաստանում բիզնես սկսելու և աշխատելու համար։

Տիգրան Կարապետյանը չթաքցրեց, որ բիզնես սկսելու համար բարենպաստ պայմաններ են ստեղծվել հենց Սուրիկ Խաչատրյանի հեռանալուց հետո, մթնոլորտը մաքրվել է։ «Մեծ հաշվով վարչապետ Կարեն Կարապետյանի նշանակումով և հայտնի փոփոխությամբ մթնոլորտը փոխվեց։ Այո, այլևս նախկին խանգարող հանգամանքները չկան»,- հավելեց գործարարը։

Իսկապե՞ս թուլացել է Սուրիկ Խաչատրյանի ազդեցությունը Գորիսում, առաջվա վախի մթնոլորտն իսկապե՞ս չկա՝ հարցրինք Կարապետյանից։ «Միանշանակ փոփոխություն կա։ Գորիսում շրջելով՝ այլևս չկա այդ վախի մթնոլորտը։ Միանշանակ փոփոխություն զգացվում է»,- ասաց մեր զրուցակիցը։

Հիշեցնենք, որ Տիգրան Կարապետյանը 2014-ին մասնակցում էր Գորիսի քաղաքապետի ընտրություններին, սակայն հայտնի պատճառներով նա ընտրապայքարի կեսից հանեց իր թեկնածությունը։ Այնուհետև էլ ավելի սրվեցին նրանց հարաբերությունները, երբ Սուրիկ Խաչատրյանի որդին իր ազգականների ու ընկերների հետ Սդղի գյոլ կոչվող տարածքում դաժան ծեծի էր ենթարկել Զաքարյան եղբայրներին, որոնցից մեկը ծեծի հետևանքով կորցրել էր աչքը։ Զաքարյանները Տիգրան Կարապետյանի մտերիմներն էին, և վերջինս համարում էր, որ այդ ծեծը ուղղակիորեն մեսիջ է՝ ուղղված իրեն։ Այդ դեպքերից հետո Տիգրան Կարապետյանը մեկ անգամ էլ հարցաքննվեց Սուրիկ Խաչատրյանի դեմ մահափորձի գործով, որից հետո գործարարը տևական ժամանակ Հայաստանում չէր։

Իսկ հիմա, երբ այլևս Սյունիքի մարզը ու հատկապես Գորիս քաղաքը ազատագրված է Սուրիկ Խաչատրյանի ազդեցությունից ու նրա հովանավորած կրիմինալ մթնոլորտից, գործարարները վերադառնում են և սկսում իրենց կիսատ թողած գործը։

Ի դեպ, Տիգրան Կարապետյանը մեզ հետ զրույցում ասաց, որ քաղաքականությամբ ևս հետաքրքրվում է, ներգրավված է նաև այս ընտրական պրոցեսներին։ Սատարում է Գորիսում առաջադրված գործարար Առուշան Առուշանյանին։