«18 տարեկանները չպետք է կանգնեն սահմանին». Արթուր Բաղդասարյան

«Հայկական վերածնունդ» կուսակցության ներկայացուցիչները հանդիպեցին Արաբկիր համայնքի ընտրողներին: «Արմենպրես»-ի հաղորդմամբ` մարտի 10-ին Եվրոպական ակադեմիայի դահլիճում «Հայկական վերածնունդ» կուսակցության թիվ 2 ընտրատարածքում (Դավթաշեն և Արաբկիր վարչական շրջաններ) առաջադրված 5 թեկնածուները և կուսակցության նախագահ Արթուր Բաղդասարյանը հանդիպեցին ընտրողների հետ և ներկայացրեցին իրենց նախընտրական ծրագրի 30 քայլը: Արթուր Բաղդասարյանի ներկայացմամբ` այդ ընտրատարածքում իրենց կուսակցությունից առաջադրվել են հրապարակախոս, հասարակական գործիչ Կարինե Հակոբյանը, գիտությունների թեկնածու Արմեն Ավագյանը, փորձաշատ անձնավորություն Սուրեն Գրիգորյանը, երիտասարդ, առողջ հավակնություններ ունեցող Հայկ Արամյանը, ՀՎԿ-ի հիմնադիրներից Մուշեղ Տերյանը:

Արթուր Բաղդասարյանի վստահեցմամբ` կուսակցությունը ներկայացրել է 30 քայլ, որոնք կփոխեն Հայաստանը, 30 նպատակ, որոնք կբերեն վերածնունդ և անվտանգություն Հայաստանին ու հայ ժողովրդին:

«Կուսակցության 30 քայլը մշակվել են երկրում առկա խնդիրների լուրջ վերլուծության, ուսումնասիրությունների հիման վրա, որոնք թույլ կտան երկրում որակական փոփոխություններ կատարել: Մեր ծրագրերը լույս ու փոփոխություն են բերելու բազմաթիվ ոլորտներում: Ես ասում եմ, որ 18 տարեկանները չպետք է կանգնեն սահմանին, սա փաստարկված մոտեցում է, մեր ծրագրերը հանգեցնելու են մասնագիտացված բանակի: Ես քաջածանոթ եմ այս ոլորտի խնդիրներին, անգիր գիտեմ Հայաստանի բյուջետային խնայողություններն ու ծախսերը, ուսումնասիրել եմ աշխարհի փորձը: Մենք կարող ենք ունենալ մասնագիտացված բանակ»,-ասաց Բաղդասարյանը:

ՀՎԿ առաջնորդն անդրադարձավ նաև իրենց հեղինակած օրենքներին: Նրա խոսքով` այդ օրենքներից մեկի արդյունքում 100 հազար քաղաքացու ավանդ վերադարձվել է: Արթուր Բաղդասարյանը նշեց, որ կրթության ոլորտում իրենց հեղինակած օրենքների մշակման արդյունքում Հայաստանում վերջ դրվեց մանկապարտեզների, բուհերի շենքերի վաճառքին: Նրա խոսքով՝ ՀՎԿ-ի ծրագրում առկա յուրաքանչյուր կետ առաջարկում է կոնկրետ խնդրի լուծում, և այդ լուծումը նոր ճանապարհ է ցույց տալիս: «Մենք պետք է ամուր կանգնենք, դրա համար պետք է քաղաքական դաշտ մտնեն գրագետ մարդիկ: Արաբկիրցիներ, կատարե՛ք նման ընտրություն»,-հավելեց Արթուր Բաղդասարյանը: