«Եթե դա աներ անգրագետ մեկը, բանի տեղ չէինք դնի». Առողջապահության նախարարությունը՝ նախկին նախարարին

«Հրապարակը» գրում է․

Արդարադատության նախկին նախարար Հովհաննես Մանուկյանի ֆեյսբուքյան գրառումը պատվաստումների մասին մեծ վրդովմունք է առաջարցել Առողջապահության նախարարությունում։ Նախկին նախարարն իր գրառման մեջ քննադատել էր պատվաստումները՝ նշելով, որ դրա հետևանքով աշխարհում բազմաթիվ մարդիկ են տուժում, հաշմանդամություն ձեռք բերում։ ԱՆ աշխատակիցների վրդովմունքն այնքան մեծ ու խորն է եղել այս գրառումից, որ նրանք որոշել են պաշտոնական հաղորդագրության տեսքով, բայց, ըստ էության, ոչ պաշտոնական լեկսիկոնով արձագանքել Մանուկյանի գրառմանը։

Ահա Հովհաննես Մանուկյանին «նվիրված» գերատեսչական հաղորդագրությունից մի հատված. «Նորից հնչում են անհիմն, անապացույց` զավեշտի հասնող ինչ-որ «մտքեր»: Կարծես միջնադարի խորքից տգիտությունն է վերադարձել և դեռ բավական չէ մարդկանց կյանքերն է փորձում վտանգի ենթարկել, դեռ մի բան էլ` ձեռքի հետ այնպիսի «հուզական» մտքեր է արտահայտում, որ կթվա, թե բարեհաճորեն փորձում է ամեն ինչ ուղղել: Նման մարդկանց հորդորում ենք մինչև հուզվելը մի քանի վայրկյան մտածել ու նոր պղտորել մարդկանց հոգիները: Հետաքրքիր է, արդյոք, կգտնվի՞ մեկը, ով կարող է գնահատել, թե մարդկությունն ի՞նչ կորուստներ կունենար, եթե չլինեին պատվաստումները: Արդյո՞ք կգտնվի այն խելոքը, ով կարող է իր պատասխանատվությամբ արգելել պատվաստումները և իր խղճի վրա վերցնել հազարավոր մանուկների հնարավոր մահը կյանքի առաջին իսկ տարիներին` մեծ կորուստներով աղետի հասցնելով մեր երկիրն ու ժողովրդին»։

Նախկին նախարարն էլ երեկ պատասխան գրառմամբ հանդես եկավ՝ ԱՆ աշխատակիցներին համարելով «բալկոնից դիագնոզ դնողներ»։

Առողջապահության նախարարի խոսնակ Անահիտ Հայթայանից Hraparak.am-ը հետաքրքրվեց, թե ինչու են որոշել անձնական գրառմանը նման ոճի ձևակերպումներով արձագանքել։ Նկատեցինք, որ սովորաբար պետական գերատեսչությունները զերծ են մնում նման շարադրանքից՝ իրենց հաղորդագրությունները կառուցելով հիմնականում տրաֆարետային, չոր ու ցամաք, «քառակուսի» պաշտոնական ոճի մեջ, որտեղ որևէ գնահատական և անձնավորված որակում չի լինում։

«Ես կարծում եմ, որ դա իր գրածին շատ ադեկվատ պատասխան է։ Շատ լուրջ ծրագրի նկատմամբ չհիմնավորված բաներ գրելու պարագայում, լինելով լուրջ անձնավորություն, մտածում եմ, որ դա շատ ադեկվատ պատասխան է»,-ասաց տիկին Հայթայանը։

-Լավ, ենթադրենք՝ ես, արդարադատության նախարարը կամ որևէ մեկը «երջանիկ մոլորության մեջ ենք» և չգիտենք, որ պատվաստումը կարևոր բան է, ու հակառակ կարծիքն ենք հայտնում։ Պարտադի՞ր է, որ մի ամբողջ գերատեսչություն պաշտոնական հաղորդագրությամբ իմ մասին ասի հետևյալը. «Կարծես միջնադարի խորքից տգիտությունն է վերադարձել»։ Ճի՞շտ չէր լինի, արդյոք, իմ՝ հավանական տգիտությունը մասնագիտական փաստարկներով ցուցադրել, ոչ թե ուղիղ ասված խոսքով։

-Գիտե՞ս, եթե դա աներ անգրագետ մեկը, որը չի հասկանում՝ պետական ծագիրն ինչ է, կրթություն չունի, իհարկե բանի տեղ չէինք դնի և ինչ-որ ուրիշ կերպ կպատասխանեինք։ Ինքը մասնագետ չի, ինչու՞ է նման բաներ գրում ու մարդկանց մոլորության մեջ գցում։ Այստեղ պատասխանատվության խնդիր կա. մարդը, լինելով գրագետ մարդ, լինելով ժամանակին կառավարության անդամ, պետք է հասկանա՝ պետական ծրագիրն ինչ է, մի քիչ էլ հետաքրքրվի՝ էդ որ իմունիազցիան, պատվաստումներն անում են, դրա նպատակը որն է։ Ես կարո՞ղ եմ ինձ կամ մեր նախարարությունից որևէ մեկը թույլ տալ արդարադատության ոլորտում առանց ուսումնասիրելու իրենց պետական ծրագրերը՝ ոչ թե վատաբանել, այլ դա զուտ մարդկանց, իրոք, մոլորության մեջ գցել է նշանակում. չէ՞ որ մարդիկ կմտածեն՝ այդ մարդը լուրջ մարդ է, պետական պաշտոն, նախարարի պաշտոն, այն էլ արդարադատության, որ այդ ամեն ինչը խորությամբ ուսումնասիրի, նոր կարծիք հայտնի։

-Իսկ ինչպե՞ս կարձագանքեք նրա երեկվա գրառմանը՝ ի պատասխան ձեր տարածած հաղորդագրությանը, որտեղ կարծես թե հակափաստարկներ էր բերել։

-Այս պահին՝ ոչ մի կերպ։ Ո՞նց պիտի արձագանքեմ։ Նա ոչ մի հակափաստակ էլ չի բերել այդտեղ, ուղղակի մի բան գրել է՝ գրելու համար։ Ես կարծում եմ՝ ինքը շատ լավ գիտակցում է, որ ինքը ճիշտ բան չի արել։