Առաջիկա 2 օրը կարող է հիմնովին փոխել աշխարհը

Արդեն 48 ժամ անց «աշխարհը չի լինի այնպիսին, ինչպիսին այժմ է: Հաջորդող 2 օրերի իրադարձությունները կազդեն համաշխարհային շուկայի, եվրոպական արժույթի վրա, կփոխեն Եվրոպայի դեմքը, ու հնարավոր է` համաշխարհային գերտերության սնանկացման պատճառ դառնան»: Այսօրինակ կանխատեսմամբ են հանդես գալիս գերմանական Die Welt պարբերականի տնտեսական մեկնաբաններ Շտեֆան Բոյթելսբահերը, Նանդո Զոմերֆելդտը և Հոլգեր Ցշեպիցը:
«Սկսած 2016-ի հունիսից աշխարհը խոսում է Brexit-ի մասին, բայց իրականում այն դեռևս չի եղել: ԵՄ կազմից դուրս գալու մասին պաշտոնական հայտը, համաձայն Լիսաբոնյան համաձայնագրի 50-րդ հոդվածի, դեռևս ներկայացված չէ: Բայց արդեն երեքշաբթի (այսօր` մարտի 14-ին) կարող է ստորագրվել օրենք, որի ընդունումից հետո կսկսի գործել 50-րդ հոդվածը: Իսկ արդեն Ելիզավետա 2-րդ թագուհու համաձայնությունից հետո վարչապետ Թերեզա ՄԵյը հայտ կներկայացնի Եվրոխորհրդին»,- նշվում է հոդվածում: Մասնագետների մեծ մասը վստահ է, որ Մեյը դա կանի արդեն այսօր կամ էլ` վաղը: Որոշ քաղաքագետներ էլ ենթադրում են, որ Մեյն այդ գործընթացը կսկսի ոչ թե Նիդեռլանդների ընտրությունների նախօրյակին, այլ մարտի վերջին: (Վաղը Նիդեռլանդներում կանցկացվեն խորհրդարանի ստորին պալատի ընտրություններ: Ըստ հարցումների` քաղաքացիների մեծ մասը պատրաստ է իր ձայնը տալ «Ազատություն և ժողովրդավարություն կուսակցությանը», որի նախընտրական ծրագրում առաջին կետը ԵՄ կազմից դուրս գալն է):
«Արդյունքում կսկվի Brexit-ի կոշտ մասը»,- համոզված է Fitch գործակալության վերլուծաբան Ջեյմս Մաքքորմաքը: Ըստ նրա` բրիտանացիները կհայտնվեն դժվարին կացության մեջ: Մասնավորապես, նրանց դեպքում մեծ կլինի այն հաշիվը, որ Եվրոպան կներկայացնի բրիտանացիներին: «Արդեն հիմա պարտքերը մեծ խնդիր են Մեծ Բրիտանիայի համար: Պարտավորվածության մակարդկը կազմում է երկրի ՀՆԱ-ի 90%-ը: Բրիտանիայի համար ծայրաստիճան կարևոր է արտասահմանյան կապիտալը, ու եթե ներդրողները կորցնեն վստահությունը, երկրին ֆինանսական ճգանաժամ է կսպառնա: Հետևաբար, շատ բան է կախված արտասահմանցի ներդրողի արձագանքից»,- նշում են հոդվածի հեղինակները: Հատկանշական է, որ Deutsche Bank-ի կանխատեսկակբ` Brexit-ի գործընթացից հետո բրիտանական ֆունտը շուրջ 6%-ի անկում կգրանցի:
«Նիդեռլանդների ընտրություններով կմեկնարկի եվրոպական ընտրությունների սուպերտարին: Եթե հաղթանակ տանի Հերթ Վիլդերսը («Ազատություն և ժողովրդավարություն կուսակցություն»), ապա հնարավոր է` գործի դոմինոյի էֆեկտը. աջակողմյաններն ընդունելի կդառնան Եվրոպայում և դա նախադրյալներ կստեղծի Ֆրանսիայի նախագահական ընտրություններում ծայրահեղ աջակողմյան Մարին Լե Պենի հաղթանակի համար»,- կարծիք են հայտնում հոդվածագիրները:
Վաղը մեկ այլ վճռորոշ քայլ էլ կատարվելու Միացյալ Նահանգներում: ԱՄՆ Դաշնային պահուստային ֆոնդի նախագահ Ջենեթ Յելենը կանի այն, ինչ «հաստատ դուր չի գա աշխարհին», կբարձրացնի վերաֆինանսավորման տոկոսադրույքը: Իսկ եթե աշխարհի ամենազորեղ կենտրոնական բանկը բարձրացնի աշխարհի ամենակարևոր արժույթի արժեքը, ապա, վերլուծաբանների կանխատեսմամբ, կողմնակի ազդեցություններից խուսափելն արդեն անհրան կլինի:
Ֆինանսական շուկաներն ԱՄՆ-ում վերաֆինանսավորման տոկոսադրույքի բարձրացումը «Դաշնային պահուստային ֆոնդի անեծք» են անվանում` հիշեցնելով, որ բորսային յուրաքանչյուր կոլապսին նախորդել է հիմնային տոկոսադրույքի բարձրացում: Այդպես եղել է 1974, 1987, 2000 և 2008 թվականներին: Այդ իրադարձությունը կարող է նաև ձախողել ԱՄՆ նախագահ Դոնալդ Թրամփի քաղաքական բոլոր ծրագրերը: «Տնտեսության խթանման համար մշակված ավելի քան 1 տրիլիոն դոլար արժողությամբ ծրագիրը, որը ֆինանսավորվելու է հիմնականում վարկերի միջոցով, կարող է կյանքի կոչվել միայն էժան փողերի օգնությամբ»,- բացատրում են հեղինակները: