Ծառայակցի նկատմամբ սեռական ոտնձգություն կատարելու համար զինծառայողը ծեծի է ենթարկվել

1in.am / Արմավիրի մարզի ընդհանուր իրավասության դատարանում Վահե Խալաթյանի նախագահությամբ ավարտվել է Մխիթար Ա.-ի գործի դատական քննությունը:

Ըստ դատական ակտի՝ 27-ամյա Մխիթարը պայմանագրային կարգով ծառայել է որպես սակրավոր ու զինվորական ծառայությանը զուգահեռ զբաղվել է… բախտագուշակությամբ:

Որպես բախտագուշակ՝ նա հանրապետության տարբեր բնակավայրեր է այցելել: Մասնավորապես՝ 2015 թվականի դեկտեմբերին «հյուրընկալվել է» Գյումրիում և ծանոթացել է Ազատ (անունը փոխված է) Հ.-ի ու նրա ընտանիքի հետ:

Մխիթարի բախտագուշակություններին այս ընտանիքում հավատ են ընծայել, և Մխիթարը հետագայում մի քանի անգամ այցելել է նրանց: Մտերմացել են: Ընտանիքը, փաստորեն, ունեցել է իր «ընտանեկան» բախտագուշակը:

Հերթական անգամ Մխիթարը Գյումրի՝ Ազատի տուն է գնացել 2016 թվականի փետրվարի 7-ին՝ ծանոթ տաքսու վարորդ Արթուրի մեքենայով:

Ազատի «բախտը բացելով»՝ Մխիթարն անհանգստացած ասել է, թե նրա վրա «թուղթուգիր» կա, որը շտապ պետք է հանել, որպեսզի նա անհաջողությունների մեջ չընկնի:

«Թուղթուգիրը» տեղում հանել «հնարավոր չի եղել», Մխիթարն Ազատին ասել է, թե «թուղթուգիրը» հանելու համար նա իր հետ պետք է մեկնի Էջմիածին՝ իր վարձակալած տուն:

Մխիթարը Ազատին խոստացել է, որ «թուղթուգիրը» հանելուց հետո ինքն անձամբ՝ իր միջոցներով նրան կճանապարհի Գյումրի:

Ազատը հավատացել է Մխիթարին ու համաձայնել է:

Մխիթարն ու Ազատը Արթուրի տաքսիով Գյումրիից մեկնել են Էջմիածին՝ Մխիթարի վարձակալած տուն:

Մխիթարը Ազատին գարեջուր և էներգետիկ ըմպելիք է հյուրասիրել:

Այնուհետև Մխիթարն Ազատին ասել է, թե իր տանը միայն մեկ մահճակալ կա, ու իրենք երկուսով պիտի պառկեն նույն մահճակալին: Հենց այնտեղ էլ ինքը պիտի Ազատի վրայից հանի «թուղթուգիրը» ու միաժամանակ նրան պիտի «էներգիա տա»:

Մխիթարն ու Ազատը մի քանի ժամ պառկել են նույն անկողնում: Մխիթարը, իբր բախտագուշակության ու «թուղթուգիր հանելու» շրջանակներում, մերսել է Ազատի որովայնը ու ձեռքով հպվել է Ազատի անդամին:

Ազատը միամիտ էր, բայց ոչ ծայրահեղ աստիճանի: Նա Մխիթարի գործողություններն ընկալել է ոչ թե որպես «թուղթուգրի» վերացում, այլ՝ որպես սեռական ոտնձգություն: Ազատի տղամարդկային արժանապատվությունը վիրավորվել է: Նա ծեծի է ենթարկել Մխիթարին:

Դրանից հետո Ազատը գիշերով զայրացած դուրս է եկել Մխիթարի տանից, որ գնա Գյումրի՝ իր տուն: Բայց հիշել է, որ գումար չունի, ու Մխիթարն էր խոստացել իրեն ճանապարհել տուն:

Ազատը վերադարձել է Մխիթարի տուն, նրանից գումար է ուզել՝ տուն վերադառնալու համար:

Մխիթարը անկողնու կողքին դրված աթոռի վրայից վերցրել է իր ջինսե շալվարը, գրպանից հանել է 23 հազար դրամ ու 20 հազար դրամը սեփական կամքով տվել է Ազատին:

Ազատը հեռացել է:

Մխիթարը զանգել է այն զորամաս, որտեղ ծառայում էր, ու ասել է, թե իրեն ծեծել են:

Զորամասի աշխատողը մեքենայով եկել է Մխիթարի տուն, նրան տարել է հիվանդանոց, որտեղ Մխիթարը հայտարարել է, թե գիշերը իր տուն են մտել գողություն անելու և ծեծել են իրեն:

Սկզբում Մխիթարը հրաժարվել է դեպքի մանրամասները ներկայացնելուց, բայց երբ Ազատին բերման են ենթարկել ոստիկանություն, Ազատը բացատրություն է տվել, Մխիթարը, նրա նկատմամբ իր ցուցաբերած «անպարկեշտ վարքագիծը քողարկելու նպատակով» սուտ մատնություն է կատարել՝ հաղորդում տալով, թե Ազատ Հ.-ն մտել է իր տուն, իրեն ծեծի է ենթարկել ու դանակով սպառնալով՝ իրենից հափշտակել է 50 հազար դրամ:

Մխիթարի հաղորդումը, այսպիսով, եղել է ավազակային հարձակման մասին սուտ մատնություն:

Մխիթարը նաև արհեստական ապացույցներ է ստեղծել՝ ասել է, թե իր նախաբազկի վրայի երկու ճանկռվածքները ավազակային հարձակման ժամանակ պատճառել է Ազատ Հ.-ն՝ դանակով: Մինչդեռ քննությամբ հաստատվել է, որ փետրվարի 8-ին, երբ նա ծառայակցի հետ ներկայացել է բժշկական զննության, այդ ճանկռվածքները նրա նախաբազկի վրա չեն եղել:

Քննությամբ բացահայտվել է, որ Մխիթարը կատարել է սուտ մատնություն և ստեղծել է արհեստական ապացույցներ՝ իր հորինած սուտ մեղադրանքը հաստատելու համար:

Մխիթարին մեղադրանք է առաջադրվել ՀՀ քրեական օրենսգրքի 333 հոդվածի 2-րդ մասի 1-ին և 2-րդ կետերով:

Նախաքննության ժամանակ Մխիթար Ա.-ն իրեն մեղավոր չի ճանաչել, հրաժարվել է ցուցմունքներ տալուց:

Դատական քննության ժամանակ Մխիթար Ա.-ն իրեն լիովին մեղավոր է ճանաչել, նրա միջնորդությամբ գործը քննվել է արագացված ընթացակարգով:

Դատարանը հաշվի է առել, որ Մխիթարի խնամքին են մայրն ու անչափահաս քույրը:

Մխիթար Ա.-ն մեղավոր է ճանաչվել ՀՀ քրեական օրենսգրքի 333 հոդվածի 2-րդ մասի 1-ին և 2-րդ կետերով, դատապարտվել է 1 տարի ազատազրկման: Նրա նկատմամբ կիրառվել է պայմանական դատապարտություն և սահմանվել է 1 տարի փորձաշրջան: