Մոդել Սոնա Ղազարյանը ներկայացրել է Հայաստանը «Miss Oriental Tourism Pageant 2017» մրցույթում / Լուսանկարներ

Մոդել Սոնա Ղազարյանը մեծ փորձով ու տպավորություններով է վերադարձել Չինաստանում տեղի ունեցած միջազգային «Miss Oriental Tourism Pageant 2017» մրցույթից: Մարտի 5-14-ը տեղի ունեցած գեղեցկության մրցույթում ընդգրկվել է թոփ տասնյակում եւ արժանացել է Miss Photogenic 2017 մրցանակին: Շատ ուրախ է, որ կարողացել է պատվով ներկայացնել հայրենիքը: Armtimes.com-ի հետ զրույցում նա խոսեց ձեռքբերումների մասին:

«Մրցույթն ինձ տվեց շատ մեծ փորձ այս ասպարեզում եւ, կարելի է ասել, մեծ հույս ու էներգիա հետագա գործունեությունս ծավալելու եւ նոր հաջողություններ գրանցելու համար: Շատ ուրախ եմ, որ ես էի ընտրվել Հայաստանը ներկայացնելու համար: Սա իմ 1-ին միջազգային մրցույթն էր, եւ ջանք ու եռանդ չեմ խնայել, որպեսզի հնարավորինս լավ եւ պատվով ներկայացնեմ իմ հայրենիքը: Մրցակցությունը շատ մեծ էր, քանի որ բոլորն էլ գեղեցկուհիներ էին եւ արժանի էին հաղթանակի: Շատ ուրախ եմ եւ հպարտ, որ արժանացել եմ Miss Photogenic 2017 մցրանակին, դա շատ պարտավորեցնող է: Նաեւ ընդգրկվել եմ լավագույն տասնյակում, դա ես արդեն հաղթանակ եմ համարում»,- ասաց նա:

Մրցույթին մասնակցել են 55 երկրից մասնակիցներ: Հաղթող է դարձել պորտուգալացի Անա Կլաուդիա Օրնելաշ Բոմֆիմը, 1-ին վիցե կոչմանն է արժանացել Տաջիկստանի ներկայացուցիչ Յոսուման Խոլովան, 2-րդ վիցե միսս՝ Չինաստանի ներկայացուցիչ՝ Լի Յուան Յանը: Չինաստանում անցկացրած օրերը մասնակիցների համար շատ հագեցած են եղել: Նրանք այցելել են տեսարժան վայրեր, ծանոթացել են չինական մշակույթին, ներկայացրել իրենցը: Այդ ամենը շատ հետաքրքիր է եղել, սակայն կա մի պահ, որը Սոնան երբեք չի մոռանա:

«Անմոռանալի պահերից էր, երբ վերջին օրը ՝ եզրափակչի ժամանակ, ներկայացնում էի Հայաստանը մի ամբողջ բազմության առաջ՝ միջազգային բեմում: Այդ րոպեներին աննկարագրելի հպարտություն էի զգում»,- ասում է նա:

Սոնան Չինաստանում տեղի ունեցած մրցույթին մասնակցել է «Համաշխարհային գեղեցկության եւ նորաձեւության լիգայի» նախագահ Աշոտ Խաչատրյանի առաջարկով: Մրցույթից հետո վերադարձել է Հունգարիա: Նա այնտեղ է ապրում եւ աշխատում է մայրաքաղաք Բուդապեշտում՝ Epam Systems միջազգային կազմակերպության ադմինիստրացիայում: Միաժամանակ մոտ 6 տարի է, ինչ զբաղվում է մոդելինգով: Չինաստանի մրցույթից հետո ստացել է՝ Top Model World, Miss Intercontinental, Miss Model World, Miss Earth Model միջազգային մրցույթներին մասնակցելու հրավերներ, որոնց շուրջ դեռ մտածում է: Ցանկանում է ապագայում մոդելինգով զբաղվել նաեւ Հայաստանում: