Օդից փող, այն էլ 400 հզ. դրամ

«Հրապարակ»-ը գրում է.

Էջմիածին-Երեւան-Էջմիածին գիծն սպասարկող տաքսու վարորդներից մի քանիսը երեկ դժգոհում էին, թե ինչու պետք է օրական 5 հազար դրամ վճարեն գծատիրոջը, երբ վերջինս որեւէ ներդրում չի անում: «Ոչ վառելիքի գումար ա տալիս, ոչ անվադողեր, ոչ մեքենայի մաշվածության գին ա հանում, բայց ամեն վարորդից օրական պարտադիր 5 հազար դրամ ա տանում»,-ասաց վարորդներից մեկը՝ խուսափելով ներկայանալ: «Գծատերը գեներալ Մանվելի փոքր տղան ա՝ Արմանը, հո գլխիցս ձեռք չե՞մ քաշել, որ անուն-ազգանունով ներկայանամ»,-ասաց բողոքողը:

Ըստ վարորդների՝ այս պահին գիծն սպասարկող շուրջ 80 մեքենա կա՝ բոլորն էլ անձնական օգտագործման: «Մարդիկ իրենց անձնական մեքենաները բերել՝ տաքսու տակ քշում են, որ ընտանիք պահեն: Իսկ իրենք, բան չանելով, օրական մուծվելու պահանջ են դնում: Ո՞վ ա տեսել, որ առանց կոպեկ ներդնելու միլիոններ ստանան: Տենց բան մենակ մեր երկրում կարա լինի»,-միջամտեց երկրորդ վարորդը:

Գեներալի ընտանիքին պատկանող բիզնեսներին քաջատեղյակ վարորդների ասելով՝ ամենայուղոտ պատառն Էջմիածին-Երեւան գիծն է: Օրական նվազագույնը 400 հազար դրամ միայն տաքսու վարորդներն են վճարում: «Դե հաշվեք, թե ամսական ինչ թվեր ենք մուծում միայն նրա համար, որ թույլ տան մեր սեփական մեքենան քշենք: Լավ, էլի տանք, բայց գոնե մի բան անեն, որ փողը տալուց էլ իմանանք ինչի համար ենք տալիս»,-ասացին:
Վարորդների տեղեկացմամբ՝ Էջմիածին-Երեւան ուղեւորափոխադրող տաքսիներն ինքնաբուխ են կազմակերպվել՝ 90-ականներին: «Այդ տարիներին ոչ նորմալ տրանսպորտ էր գործում, ոչ էլ վառելիք կար: Մարդիկ ժամերով մնում էին կանգառներում: Մեքենա ունեցողները, պահն օգտագործելով, իրենց սեփական ավտոները դրել են տաքսու տակ ու քշել: Տարեցտարի նոր տաքսիներ են ավելացել ու մինչեւ հիմա էլ ավելանում են»:
Մեր զրուցակից երեք վարորդներից երկուսը պատրաստվում են ընտանիքներով լքել Հայաստանը: Ասացին, որ գնում են շահագործված լինելուց վիրավորված: Նրանք իրենց համարում են խոցելի եւ անպաշտպան: