Պաշտոնյաները հրաժարական են տալիս, որ ոչ պակաս յուղոտ թոշակ ստանան

«Հրապարակ»-ը գրում է․

Արդեն հայտնել էինք, որ մեծահասակ դատավորները բարձր թոշակ ստանալու պատճառով թոշակային տարիքից շուտ դիմումներ են գրում, ազատվում աշխատանքից, քանի որ «Պետական պաշտոններ զբաղեցրած անձանց սոցիալական երաշխիքների մասին» օրենքում կատարված փոփոխություններով 20 եւ ավելի տարվա ստաժ ունեցող դատախազները եւ դատավորները մինչեւ 2017 թվականի հուլիսի 1-ը թոշակի անցնելու դեպքում իրենց վերջին մեկ տարվա միջին աշխատավարձի 75 տոկոսի չափով թոշակ կստանան։ Իսկ ավելի ուշ թոշակի մեկնողների թոշակի չափը հաշվարկվելու է ընդհանուր հիմունքներով։ Եվ, ահա, մեզ հասած տեղեկություններով` բարձր թոշակ ստանալու պատճառով դատավորի պաշտոնին հրաժեշտ տալու ցանկություն ունի Տավուշի մարզի ընդհանուր իրավասության դատարանի երկարամյա դատավոր, վերջերս Կոտայքի դատարան տեղափոխված Աշոտ Խաչիկյանը: Նրա կենսաթոշակի տարիքը լրանում է 2019թ., բայց նա ցանկանում է հիմա գնալ թոշակի, կլինի երկուսը մեկում` եւ կհանգստանա, եւ բարձր թոշակ կստանա: Նշենք, որ նախկին ազատամարտիկ, «Կոլցո» օպերացիայի ժամանակ գերի ընկած Աշոտ Խաչիկյանը 1996-1999 թթ. աշխատել է Դիլիջանի դատարանում՝ որպես դատավոր, 1999 թվականից՝ ՀՀ ԴԱՀԿ Տավուշի մարզային ստորաբաժանման պետի պաշտոնում: Նա ժամանակին հայտնվել էր սկանդալի կենտրոնում, մամուլում հրապարակումներ էին եղել, որ Աշոտ Խաչիկյանը, չարաշահելով պաշտոնական դիրքը, տիրացել է իր հարազատներից մեկի հողակտորին եւ տանը: