Ադիբեկյանն ասել է, թե ով ինչքան ձայն է ստանալու

«Սոցիոմետր» սոցիոլոգիական կենտրոնի ղեկավար Ահարոն Ադիբեկյանն այսօր մամուլի ասուլիսին հայտնեց, որ իրենց տվյալների համաձայն՝ հարցվածների 38 տոկոսն առաջիկա ԱԺ ընտրություններում իր ձայնը տալու է Հայաստանի Հանրապետական կուսակցությանը, 33 տոկոսը՝ «Ծառուկյան» դաշինքին։

«ՀՀԿ-ն և Ծառուկյան դաշինքը առաջին և երկրորդ տեղի համար են պայքարում, և հնարավոր է՝ լինեն մեծամասնություն, որ կառավարություն ձևավորեն»,-ասաց նա:

Ահարոն Ադիբեկյանը նշեց, որ ակտիվ ընտրողների 17 տոկոսը դեռ չգիտի՝ ում է ընտրելու, նրանք կարող են ձայն տալ տարբեր քաղաքական ուժերի:

«28 տոկոսն ասել է՝ գնալու ենք, բայց չենք ասի, թե ում ենք ընտրելու, և նրանք հիմնականում չեն մասնակցում ընտրություններին»,-ասաց նա և նշեց, որ «Օհանյան-Րաֆֆի Օսկանյան», «Ելք» դաշինքների և «Հայկական վերածնունդ» կուսակցության ձայները տատանվում են 2,5-5,5%-ի սահմաններում: Նա նշեց, որ «Ազատ դեմոկրատներ» կուսակցությունը և «Կոնգրես-ՀԺԿ» դաշինքը ակտիվության դեպքում հնարավոր է՝ ինչ-որ տեղ գրավեն:

«Մենք կարող ենք ունենալ 5-6 քաղաքական միավորում ԱԺ-ում, եթե ՀՀԿ-ն և Ծառուկյանն ավելի շատ ձայն չվերցնեն իրենց վրա, քանի որ իրենց ռեսուրսները բավականին հզոր են»,-ասաց նա։

Սոցիոլոգը նշեց, որ ընտրողների համար կարևոր է թեկնածուի կրթված լինել, դիրք, հեղինակություն ունենալը և կարևոր է, որ տարիքը լինի քառասունից բարձր։

Ահարոն Ադիբեկյանն ասաց, որ Հայաստանում ընտողների մեկ երրորդի համար միևնույն է, թե ով կլինի իշխանության, միայն թե իրավիճակ չփոխվի, և իրենք չեն ուզում իշխանափոխություն:

«Իշխանությունն այդ պահպանողական 30 տոկոսի հաշվին է վերարտադրվում»-ասաց նա:

Անդրադառնալով անհատների վարկանիշին՝ սոցիոլոգն ասաց. «Կարեն Կարապետյանը ամենաազդեցիկ, խոստումնալից, ընդունելի քաղաքական գործիչն է, 60 նիշ է նրա ռեյտինգը կազմում, հետո՝ Ծառուկյանը՝ 40 նիշ, Սերժ Սարգսյանը՝ 10 նիշ»,-ասաց նա:

Անդրադառնալով արցախյան հակամարտությանը՝ նա նշեց, որ հարցվածների 83 տոկոսն է գտնում, որ պետք է գնալ մինչև վերջ, 5.5 տոկոսը պատրաստ է զիջումներ անել, 1.5 տոկոսը ասում է՝ թող ԼՂ-ն մնա Ադրբեջանի կազմում: Ըստ սոցիոլոգի՝ «Կոնգրես-ՀԺԿ» դաշինքը հույսը դրել է այդ մոտ 7 տոկոսի վրա, չնայած չի կարծում, որ նրանց մեծ մասը լսել է ՀՀ առաջին նախագահ Լևոն Տեր-Պետրոսյանի ելույթը:

Ինչ վերաբերում է քաղաքական ուժերի նախընտրական կարգախոսներին, ապա նա ասաց, որ օրինակ «Հայ Յեղափոխական Դաշնակցության» կարգախոսը՝ «Արդար Հայաստանը» չի կերակրում մարդկանց:

«Հայերը չեն վստահում կարգախոսին, հավատում են դեմքին»,- ասաց նա: