«Տղայիս կյանքն օդից է կախված». ավազակային հարձակման մեջ մեղադրվողի մայրն անհանգստացած է

Մալաթիա-Սեբաստիա վարչական շրջանի ընդհանուր իրավասության դատարանում Կարեն Ֆարխոյանի նախագահությամբ շարունակվում է Արմեն Մ.-ի գործով դատական քննությունը:

40-ամյա Արմենին մեղադրանք է առաջադրված ավազակային հարձակման համար՝ ՀՀ քրեական օրենսգրքի 175 հոդվածի 2-րդ մասի 4-րդ կետով:

Ամբաստանյալ Արմեն Մ.-ն արդեն երկու ամիս գտնվում է դատապարտյալների հիվանդանոցում: Գործի նախաքննության ժամանակ նա վարույթն իրականացնող մարմնին տեղյակ չի պահել, որ տառապում է մի շարք ծանր, այդ թվում՝ մեկ անբուժելի հիվանդությամբ:

Նախաքննության ընթացքում Արմեն Մ.-ի նկատմամբ դատաբժշկական փորձաքննություն չի նշանակվել ու չի անցկացվել: Դատական քննության ընթացքում Արմեն Մ.-ի առողջական վիճակը վատացել է, նրան տեղափոխել են դատապարտյալների հիվանդանոց:

Արմեն Մ.-ի շահերի պաշտպան, հանրային պաշտպանի գրասենյակի փաստաբան Էմին Բեգլարյանը դատարանին միջնորդել էր Արմեն Մ.-ի նկատմամբ ընտրված խափանման միջոց կալանավորումը փոփոխել, ընտրել ազատազրկման հետ չկապված խափանման միջոց՝ իր պաշտպանյալի առողջական ծանր վիճակը նկատի ունենալով:

Դատարանը մերժել է պաշտպանի միջնորդությունը:

Փաստաբան Էմին Բեգլարյանը միջնորդություն էր պատրաստել՝ իր պաշտպանյալի նկատմամբ դատաբժշկական փորձաքննություն նշանակելու վերաբերյալ՝ պարզելու՝ Արմեն Մ.-ի ունեցած հիվանդությունների համակցությունը թույլ տալի՞ս է, որ նա գտնվի անազատության պայմաններում: Սակայն ամբաստանյալը չհամաձայնեց, որ պաշտպանն այդ միջնորդությունը ներկայացնի դատարանում, նա միջնորդության տեքստի տակ գրեց այդ մասին ու ստորագրեց:

Ամբաստանյալն իր պաշտպանին ասաց, թե չի հավատում, որ նույնիսկ դատաբժշկական փորձաքննությամբ ինչ-որ դրական տեղաշարժ կլինի, քանի որ իր աչքի առաջ կան շատ ծանր վիճակում գտնվող կալանավորներ, բայց ոչ մեկի խափանման միջոցը չեն փոխում:

Դատարանում էր ամբաստանյալ Արմեն Մ.-ի մայրը, ով շատ անհանգիստ էր որդու առողջական վիճակի համար, նա անընդհատ կրկնում էր, թե որդու կյանքը «օդից է կախված», և ինքը «ճար չունի»՝ նրան ինչ-որ կերպ օգնելու, ամբողջ հույսը դատարանի խղճի վրա է:

Մայրն ասաց, թե Արմենը արհեստավոր է, «ամեն մատը մի ոսկի է», նա աշխատող, վաստակող է եղել, «ջիգյարով», բայց շատ հիվանդ տղա է:

Արմենը հակում է ունեցել խմիչքի հանդեպ, դա էլ նրան, կարելի է ասել, կործանել է:

Արմեն Մ.-ի գործողություններից տուժել, գործով տուժող է ճանաչվել Ալիսա Մ.-ն (անունը փոխված է), ով Արմենի մտերմուհին է եղել: Արմեն Մ.-ն ընտանիք չունի, ապրել է մոր հետ:

Ըստ մեղադրանքի՝ 2015 թվականի դեկտեմբերի 27-ին, ժամը 17-ի սահմաններում Արմեն Մ.-ն իր ծանոթ Դավիթի հետ գնացել է մտերմուհու՝ Ալիսայի բնակարան: Այնտեղ խմիչք են օգտագործել: Այնուհետև Արմենն ու Ալիսան առանձնացել են ննջարանում:

Արմենը, առաջադրված մեղադրանքի համաձայն, ոչ թե քնքուշ վերաբերմունքի համար է առանձնացել տանտիրուհու հետ, այլ նրա նկատմամբ բռնություն է գործադրել՝ ձեռքով հարվածել-գցել է մահճակալին, դանակով սպառնացել ու պահանջել է գումար և ոսկե զարդեր:

Ալիսան հրաժարվել է կատարել Արմենի պահանջը:

Վերջինս, ըստ մեղադրանքի, կպչուն ժապավենով կապել է Ալիսայի ոտքերն ու ձեռքերը, փակել է բերանը, դանակով ծակոցներ է հասցրել՝ տուժողի առողջությանը պատճառելով թեթև վնասի հատկանիշներ չպարունակող վնասվածքներ:

Այնուհետև նա տուժողի զգեստապահարանից գտել է նրա դրամապանակը, դրա միջից հափշտակել է 25 հազար դրամ, 2 հազար դրամ՝ մետաղադրամով, և 10 հազար դրամ արժողության էժանագին զարդեր՝ բիժու:

Կատարվածի վերաբերյալ տուժողը ոստիկանություն է դիմել դեպքից մոտ տասն օր հետո՝ ինչպես մեր զրույցում ասաց ամբաստանյալի շահերի պաշտպան Է. Բեգլարյանը: Տուժողն այդ ընթացքում այցելել է նաև Արմենի մայրիկին ու ասել է, թե ինքն ու Արմենը վիճել են, բայց ոչինչ չի ասել իրենից գումար կամ բիժու հափշտակելու վերաբերյալ:

Տուժողը նախաքննական ցուցմունքներում, ինչպես նաև Արմեն Մ.-ի հետ առերես հարցաքննության ժամանակ, նաև՝ դատաքննության սկզբնական փուլում հայտնել է նույնը, ինչ ներկայացված է մեղադրանքի մեջ:

Սակայն դատական քննության ընթացքում դատարանը ստացել է տուժողի դիմումը այն մասին, թե ինքը խղճի խայթ է զգում, քանի որ Արմենը չի կատարել այն արարքը, որը մեղսագրված է նրան: Արմենն իրենից ոչինչ չի հափշտակել, իրենք վիճել են, Արմենը իր նկատմամբ բռնություն է գործադրել՝ իր վրա զայրանալով ու լինելով խմիչքի ազդեցության տակ… Ոստիկանությունում հաղորդումը տալու պահին ինքը զայրացած է եղել Արմենի վրա… Տուժողը խնդրել է Արմենին չդատապարտել չկատարած ծանր հանցանքի համար:

Դատարանում այս դիմումի հրապարակումից հետո ամբաստանյալի շահերի պաշտպանը միջնորդել է նորից դատարան հրավիրել և հարցաքննել տուժողին: Դատարանը բավարարել է պաշտպանի միջնորդությունը, սակայն պարզվել է՝ տուժողը խուսափում է դատարան ներկայանալուց: Նրան բերման ենթարկելու որոշում էր կայացրել դատարանը, բայց ոստիկանությունից պատասխանել էին, որ տուժողի բնակարանի դուռը փակ է եղել, հարևաններն ասել են՝ չգիտեն, թե որտեղ է բնակարանատերը:

Ամբաստանյալի շահերի պաշտպանն ու ամբաստանյալը պնդեցին, որ ցանկանում են դատարանում ստացված դիմումի լույսի ներքո նորից հարցաքննել տուժող կնոջը:

Դատարանը ևս մեկ բերման ենթարկելու որոշում կայացրեց՝ որոշումը հասցեագրելով ոստիկանության Երևան քաղաքի վարչություն:

Ամբաստանյալի շահերի պաշտպան Է. Բեգլարյանը մեր զրույցում նշեց, որ ամբաստանյալը քանիցս պնդել է, թե ինքը, մտերիմ լինելով տուժող Ալիսայի հետ, քաջատեղյակ էր, որ դեպքից մոտ տասն օր առաջ տուժողն իր ամբողջ ոսկեղենը գրավ էր դրել, այդ պատճառով ինքը չէր կարող տուժողին սպառնալ, դանակով հարվածել և ոսկե զարդեր պահանջել: Ինքը լավ գիտեր նաև, որ տուժողը գումար չունի: Իսկ բիժուի համար մի՞թե մարդը իր մտերմուհու նկատմամբ ավազակային հարձակում կկատարեր…