Ինչ անակնկալ են պատրաստել Ալիեւն ու Նազարբաեւը Հայաստանի համար

ԼՐԱԳԻՐ / Պաշտոնական այցով Բաքվում գտնվող Ղազախստանի նախագահ Նուրսուլթան Նազարբաեւին Ադրբեջանի նախագահ Ալիեւը պարգեւատրել է այդ երկրի բարձրագույն պարգեւով՝ Հեյդար Ալիեւ շքանշանով:
Դա վտանգավոր պարգեւ է, մասնավորապես Հայաստանի ու Արցախի համար, համենայն դեպս ելնելով որոշակի նախադեպից: Բանն այն է, որ նախորդ տարի Ալիեւը այդ շքանշանով պարգեւատրեց ՀԱՊԿ ու ԵՏՄ մեկ այլ անդամի՝ Բելառուսի նախագահ Լուկաշենկոյին, որն էլ հայտարարեց, թե ամեն ինչ կանի այդ բարձր պատիվն արդարացնելու համար:
Կարճ ժամանակ անց Լուկաշենկոն Մինսկում Ադրբեջանի պահանջով ձերբակալեց բլոգեր Լապշինին: Ադրբեջանի այդ պահանջը պայմանավորված էր նրանով, որ Լապշինն այցելել էր Արցախ ու նաեւ անցանկալի գրառումներ արել Ադրբեջանի իշխանության մասին: ՌԴ եւ Իսրայելի քաղաքացի Լապշինը ձերբակալվեց, իսկ մի քանի ամիս անց էլ արտահանձնվեց Բաքվին, որտեղ ներկայում գտնվում է բանտում:
Այժմ Ալիեւը Հեյդար Ալիեւ բարձրագույն շքանշան է հանձնում Ղազախստանի նախագահ Նազարբաեւին: Դա նշանակում է, որ Հայաստանն ու Արցախը պետք է լինեն աչալուրջ, քանի որ Նազարբաեւն էլ կարող է որոշել ինչ որ կերպ փոխհատուցել Ալիեւի ցուցաբերած պատիվը: Առավել եւս, որ Ալիեւի հանդեպ Ղազախստանի նախագահի ջերմ, գրեթե հայրական զգացմունքները հայտնի են վաղուց եւ Հայաստանն էլ մի քանի անգամ առնչվել է դրանց: Մասնավորապես բոլորի հիշողության մեջ թարմ է 2014 թվականի մայիսին ԵՏՄ Աստանայի Վեհաժողովում Ալիեւի նամակի նրա ընթերցումը, որն անհարմար դրության մեջ էր դրել Սերժ Սարգսյանին:
Ինչ անակնկալ կմատուցեն Ալիեւն ու Նազարբաեւը այս անգամ. Հայաստանն ու Արցախը պետք է լինեն պատրաստ, անակնկալի չգալու համար:
Նազարբաեւը կատարում է դեռեւս նախորդ տարվա աշնանից հետաձգված այցը Բաքու: Ղազախստանի նախագահը Ադրբեջան պետք է այցելեր հոկտեմբերի 12-ին, Երեւան այցելելուց առաջ, որտեղ հոկտեմբերի 14-ին պետք է մասնակցեր ՀԱՊԿ Վեհաժողովին:
Նազարբաեւը չգնաց թե Բաքու, թե չեկավ Երեւան: Նրա նստավայրը պաշտոնական պարզաբանում էր տվել, որ Նուրսուլթան Աբիշեւիչը հիվանդ է հարբուխով:
Ի դեպ հատկանշական է, որ հոկտեմբերին ՀԱՊԿ երեւանյան Վեհաժողովի օրակարգում պետք է լիներ նաեւ այդ կազմակերպության գլխավոր քարտուղարի պաշտոնում Հայաստանի ներկայացուցչի նշանակման հարցը, որը սակայն չէր քննարկվել եւ տեղափոխվել էր դեկտեմբերին Սանկտ-Պետերբուրգում կայանալիք Վեհաժողով:
Մամուլում տեղեկություն եղավ, որ հարցը հետաձգվել է Նազարբաեւի չժամանելու պատճառով: Ավելի ուշ Հայաստանի փոխարտգործնախարար Քոչարյանը հայտարարել էր, որ այդ հարում չկա կոնսենսուս: Ի դեպ, դեկտեմբերին էլ հարցը հետաձգվեց ապրիլ, քանի որ Սանկտ-Պետերբուրգ չէր ժամանել Լուկաշենկոն: