Նոր մանրամասներ Մերձմոսկվայում հայ տղամարդկանց սպանությունից

Հայտնի են դարձել նոր մանրամասներ նախօրեին Մերձմոսկվայում Հայաստանի քաղաքացի Խորեն Մարգարյանի և ՌԴ քաղաքացի, ծնունդով Աբխազիայից հայազգի Միքայել Լալայանի սպանության դեպքից: Տղամարդկանց աճյունները հրազենային վնասվածքով հայտնաբերվել էին Մերձմոսկվայի Լենինի շրջանում՝ «Մերսեդես» մակնիշի ավտոմեքենայի բեռնախցիկում:

Ինչպես հաղորդում է mk.ru-ն, ամենայն հավանականությամբ՝ սպանությունը տեղի է ունեցել կենցաղային բնույթի վեճի պատճառով: Սպանությունից մի քանի ժամ առաջ «Մերսեդես» ավտոմեքենայի սեփականատիրոջ դպրոցական ընկերուհին պաշտպանություն է խնդրել:

36-մյա Խորենը Հայաստանից ՌԴ էր ժամանել երկու շաբաթ առաջ: Նա հայրենիքում ավտոպահեստամասերի խանութ ուներ: Բացի գործնական հանդիպումներից, նա ծրագրել էր նաև վերանորոգել իր «Մերսեդես» մակնիշի ավտոմեքենան: Այս հարցում նրան պետք է օգներ իր հայազգի ընկերներից մեկը: Խորենը հանդիպում է վերջինիս հետ, այնուհետև գնում իր գործերով:

Քննիչները պարզել են, որ հանդիպումից մի քանի ժամ առաջ Խորենին զանգահարել է համադասարանցին՝ Եկատերինան, որը Մերձմոսկվա էր տեղափոխվել մի քանի տարի առաջ: Կինը խնդրել է Խորենին օգնել իրեն և պաշտպանել ծանոթ տղամարդուց, որը սպառնացել է նրան: Խորենը ընկերոջ՝ Միքայելի հետ կնոջ տանը սպասել են այդ տղամարդուն: Վերջինս հայտնվել է հրացանով և կրակել է Խորենին և Միքայելին: Այնուհետև տղամարդկանց աճյունները դրել է ավտոմեքենայի մեջ, որից հետո Եկատերինայի հետ թաքնվել անհայտ ուղղությամբ:

Այժմ ոստիկանները որոնում են մարդասպանին և այդ կնոջը: