Պաշտոնյաների որդիների ծեծկռտուքն ավարտվել է դանակահարությամբ

SHAMSHYAN.com-ի տեղեկություններով՝ Հայաստանի քննչական կոմիտեի Վայոց Ձորի մարզային քննչական վարչության Վայքի քննչական բաժնում նյութեր են նախապատրաստվում ապրիլի 5-ին Վայոց Ձորի մարզում տեղի ունեցած ծեծկռտուքի փաստով։ Ինչպես հայտնում է ֆոտոլրագրող Գագիկ Շամշյանը, ժամը 19։00-ի սահմաններում Երևան-Մեղրի ավտոճանապարհի 140-րդ կմ հատվածում գործող «Ս. Ավետյան և ընկերներ» ՍՊԸ գազալցակայանին հարակից տարածքում իրար հետ վիճաբանել, այնուհետև միմյանց հարվածներ են հասցրել Վայոց Ձորի մարզի Զառիթափ գյուղի 18-րդ փողոցի բնակիչ, 36-ամյա Սասուն Ստեփանյանը, նույն գյուղի 20-րդ փողոցի բնակիչ, 35-ամյա Դավիթ Դավթյանը, Վայք քաղաքի Շահումյան փողոցի բնակիչ, 26-ամյա Տիգրան Գևորգյանը, Վայք քաղաքի Ջերմուկի խճուղի բնակիչ, 26-ամյա Սիմոն Ավետյանը։ Գ. Շամշյանի տեղեկություններով՝ վիճաբանության արդյունքում Ս. Ստեփանյանը «աջ ազդրի վերին երրորդականի ծակած վերք» վնասվածքվ տեղափոխվել է Վայքի բժշկական կենտրոն։ Գ. Շամշյանի տեղեկություններով՝ ծեծկռտուքին մասնակցած Ս. Ավետյանը Վայքի քաղաքապետ Թարո Ավետյանի որդին է, Տ. Գևորգյանը Վայքի Ճանշինի պետ Կարո Գևորգյանի որդին է, իսկ Դ. Դավթյանը Զառիթափի նախկին գյուղապետ Խաժակ Դավթյանի որդին է։ Ըստ նախնական տեղեկությունների՝ վիճաբանությունը հրահրել է նախկին գյուղապետի որդին, ով վիրավորական արտահայտություններ է արել, այնուհետև սկսել հայհոյանքներ տալ և նրան ու նրա ընկերոջը՝ հիվանդանոց տեղափոխված Ս. Ստեփանյանին, երբ փորձել են կարգի հրավիրել, նրանք ավելի են սկսել բորբոքել վիճաբանությունը, ինչն էլ ավարտվել է դանակահարությամբ։ Հիվանդանոց տեղափոխվածի ընտանիքն էլ Վայքում հայտնի է «քարհանքեր շահագործող»։