Նիգերում հեղեղումների հետևանքով ավելի քան 270 մարդ է զոհվել
Աշխարհ
Նիգերում ռեկորդային տեղատարափ անձրևների հետևանքով առնվազն 273 մարդ է զոհվել և ավելի քան 700 000-ը դարձել ներքին տեղահանված: Այս մասին տեղեկանում ենք ՏԱՍՍ գործակալությունից։
Ագադես քաղաքը, որը գտնվում է Սահարա անապատի նիգերական հատվածում և սովորաբար համարվում է Աֆրիկայի ամենաշոգ և չոր կլիմա ունեցող քաղաքներից մեկը, ջրի տակ է հայտնվել:
Մարդկանց մեծ մասը զոհվել է այն բանի պատճառով, որ նրանց տները կառուցվել էին չթրծված կավե բլոկներից, որոնք նախատեսված չեն առատ տեղումների համար, իսկ տեղատարափ անձրևները շարունակվում են մայիսից, և այդ տները պարզապես փլվում են խոնավության տևական ազդեցությունից:
Ըստ Քաղպաշտպանության ազգային ծառայության՝ ամենից շատ տուժել են Տաուա և Մարադի շրջանները, որտեղ հաշվվում է համապատասխանաբար 87 և 86 զոհ: Ընդհանուր առմամբ, ջրհեղեղներ են գրանցվել երկրի 266 համայնքներից 201-ում, ավերվել է ավելի քան 73 000 բնակելի շենք։
Նիգերի իշխանությունները կոչ են անում բնակչությանը լքել հեղեղումների սպառնալիքի տակ գտնվող շրջանները. աղետի գոտիներ են ուղարկվում ջոկատներ՝ մարդասիրական օգնություն ցուցաբերելու և մարդկանց փրկելու համար:
Օդերևութաբանների տվյալներով՝ վերջին մի քանի շաբաթվա ընթացքում անձրևներ են տեղացել Արևմտյան և Կենտրոնական Աֆրիկայի մի շարք երկրներում՝ Գվինեայում, Կոնգոյի Դեմոկրատական Հանրապետությունում, Կոտ դ’Իվուարում, Լիբերիայում, Մալիում, Նիգերում, Նիգերիայում, Տոգոյում։
1
2
3
4
5
1
2
3
4
5
2
3
4
5
